Kaspıı teńiziniń deńgeıi 119 sm-ge kóterildi

<p>ASTANA. KAZINFORM- Bıyl Kaspıı teńiziniń soltústik-shyǵys bóliginiń (Atyraý oblysy) deńgeıi 119 sm-ge kóterildi, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.</p>

Baspasóz qyzmetiniń málimetterine qaraǵanda, sáýir-mamyr aılarynda Jaıyq ózeni arqyly tasqyn sýynyń mol kelýi, sondaı-aq Sý resýrstary jáne ırrıgatsııa mınıstrligi men jergilikti ákimdik birlesip salǵan qosymsha arnalar tıimdi áser etti.

Esterińizge sala keteıik, sý tasqyny kezinde Kaspıı teńizine Jaıyq ózeni arqyly shamamen 7,4 mlrd tekshe metr sý jiberildi. Tasqyn sýyn teńizge ótkizý úshin Atyraý oblysy boıynsha «Qazsýshar» fılıaly qosymsha kanaldardy paıdalandy. Ol arnalar arqyly Kaspııge 350 mln tekshe metr sý keldi.

«Qazsýshar» mamandary arnalardyń barlyǵynda tazartý, nyǵaıtý jáne basqa da jumystar júrgizdi. Mysaly, «Sokolok» kanalynyń boıynda uzyndyǵy 14,5 shaqyrym bolatyn qosymsha kanal qazyldy, ol arqyly tasqyn sýy Kaspııge jiberildi.

«Tasqyn sýy tek sý qoımalaryna jınalyp qana qoımaı, 12,4 mıllıard tekshe metr sý toǵandarǵa, lımandar men tabıǵı shabyndyqtarǵa jiberildi. Sý tasqyny bastalǵannan beri Balqash kóline 3,3 mlrd tekshe metr sý jiberildi. Sonymen qatar, Soltústik Aralǵa sý jiberý jumysy jalǵasyp jatyr. Jyl basynan teńizge 1,1 mlrd tekshe metrden astam sý keldi», - dedi Sý resýrstary jáne ırrıgatsııa vıtse-mınıstri Nurlan Aldamjarov.