Kaspıı teńiziniń akvatorııasynda bir aıda 703 keli bekire zańsyz aýlanǵan
Ulttyq qaýipsizdik komıteti Shekara qyzmeti baspasóz qyzmetiniń málimetinshe, bıylǵy mamyr aıynda 21 brakonerlik dereginiń joly kesilgen.
«Kaspıı teńiziniń akvatorııasynan 8 júzý quraly, jalpy uzyndyǵy 36,7 shaqyrym brakonerlik tor, 703 keli bekire tuqymdas balyq alyndy. Aldyn zalal somasy – 279 mln teńge. Bul faktiler boıynsha materıaldar buzýshylardy jaýapkershilikke tartý úshin quqyq qorǵaý jáne sot organdaryna jiberildi», - dep habarlady shekara qyzmetiniń baspasóz qyzmeti.
Elimizdiń úsh óńiri – Atyraý, Batys Qazaqstan jáne Mańǵystaý oblysynda 1 sáýir - 31 mamyr aralyǵynda «Bekire – 2024» keń aýqymdaǵy balyq qorǵaý aktsııasy ótti.
Balyq sharýashylyǵy komıteti tóraǵasynyń orynbasary Aıan Bahııanovtyń aıtýynsha, atalǵan aktsııany ótkizý úshin Aýyl sharýashylyǵy jáne Іshki ister mınıstrleri men Ulttyq qaýipsizdik komıteti tóraǵasynyń birlesken buıryǵy qabyldanǵan.
«Aktsııaǵa batystaǵy úsh oblystan 1 177 qyzmetker jumyldyrylyp otyr. Onyń ishinde 374 qyzmetker Atyraý oblysynda, 254 qyzmetker Batys Qazaqstan oblysynda, al 549 maman men áskerı qyzmetshiler Mańǵystaý oblysynyń aýmaǵynda aktsııanyń sátti ótýine atsalysady. Olar 80 qaıyqpen, shaǵyn kólemdi júzý quraldarymen, 254 avtokólik jáne kvadratsıklmen, 6 dronmen qamtyldy. Al shekarashylar sý aıdyndarynyń jaǵalaýyndaǵy 3 radıolokatsııalyq stansany paıdalanady», - degen edi Aıan Bahııanov.
Eske sala ketelik, budan buryn Atyraýda brakonerler 313 keli bekireni qamys arasyna jasyrǵanyn jazǵan edik.
Sondaı-aq, atyraýlyq polıtseıler «Bekire – 2024» aktsııasy aıasynda 454 keli bekire, 5 keli qaraýyldyryq tárkilengenin habarlaǵan bolatynbyz.