Kaspıı teńizindegi «Qashaǵan» ken ornynan sý synamasy alyndy
Atyraý oblystyq ekologııa departamentiniń baspasóz qyzmetiniń málimetinshe, keshe, 2 sáýirde arnaıy top áýeden sholý júrgizdi.
«Áleýmettik jelide jarııalanǵan Kaspıı teńizindegi «Qashaǵan» ken ornynyń aýmaǵynda munaıdyń tógilý faktisi rastalǵan joq. Quramyna Atyraý oblysy boıynsha ekologııa departamentiniń basshysy Álibek Bekmuhametov, Atyraý oblysynyń mamandandyrylǵan tabıǵat qorǵaý prokýrory Erkebulan Ermekov, departamenttiń zerthana mamany Baýbek Áldeshov jáne Atyraý oblysynyń Tótenshe jaǵdaılar departamentiniń bólim basshysy Nurlan Álıev engen birlesken top Kaspıı teńizine tekserý júrgizdi. Departamenttiń zerthana mamany teńiz sýy synamalar aldy. Qazir synamaǵa taldaý jumysy júrgizilip jatyr», - dep habarlady departamenttiń baspasóz qyzmeti.
Eske sala ketelik, keshe Kaspıı teńizindegi «Qashaǵan» ken ornynda munaı tógilýi múmkin ekenin habarlaǵan edik.
Atyraýdaǵy «Globýs» ekologııalyq-quqyqtyq bastamalar ortalyǵynyń tóraıymy Galına Chernova Kaspıı teńizinde munaıdyń tógilgeni týraly habarlady. Ol bul derekti eýropalyq Sentinel-1A spýtnıginiń 30 naýryzdaǵy radarlyq sýretine súıenip, áleýmettik jelidegi paraqshasyna júktedi.
«Osy ǵaryshtyq monıtorıngti júzege asyratyn toptyń aıtýynsha, radarlyq sýrette qazaqstandyq ýchaskedegi «Qashaǵan» ken orny mańynda munaıdyń tógilgeni beınelengen. Onyń mynadaı sebepteri bolýy múmkin. Birinshiden, óndirý kezinde munaıdyń kezdeısoq nemese apatty jaǵdaıda tógilýi, ekinshiden, saqtaý jáne kádege jaratý úshin qurlyqqa tasymaldanýy tıis munaı ónimderi bar ónerkásiptik sýdyń aǵýy, úshinshiden, kemelerde tótenshe jaǵdaı bolýy múmkin», - deıdi Galına Chernova.
Sondaı-aq «Qashaǵanda» munaı tógilgeni rastalsa, jospardan tys tekserý júrgiziletinin jazǵan bolatynbyz. Al, búgin «Qashaǵan» ken ornynda munaıdyń tógilgeni anyqtalmaǵanyn habarladyq.