Kaspıı teńiziniń jaǵalaýyndaǵy qamys órti 28 gektarǵa deıin azaıdy
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 9 shildede teńiz jaǵalaýyndaǵy jalyn sharpyǵan aýmaqqa aerovızýaldy tekserý júrgizilgen.
«Sodan keıin qamys órtin aýyzdyqtaý úshin naqty sharalar qabyldandy. Órt sóndirý jumystary áýe jáne jerústi ádisterimen júrgizildi. Qazir ashyq janý oshaǵynyń aýmaǵy 28 gektarǵa deıin tómendedi», - dep habarlady departamenttiń qoǵammen baılanys toby.
Kaspıı teńiziniń jaǵalaýyndaǵy meteorologııalyq jaǵdaı órt sóndirý jumystaryn júrgizýge qolaıly bolmaı tur. Qazir mundaǵy aýa temperatýrasy +40 gradýstan joǵary, ońtústik-shyǵystan soqqan jel ekpini – sekýndyna 10-14 metr.
«Órt sóndirýshiler qamys órtengen aýmaqqa «KazAvıaQutqarý» AQ-nyń MI-8 tikushaǵynyń STQ-5 qondyrǵysymen 68 ret sý tasyp, 200 tonnadan astam sý tókti. Jalyndy sóndirýdi departament pen «Aqjaıyq» memlekettik tabıǵı rezervatynan 100-ge jýyq adam 20 tehnıkamen jalǵastyryp jatyr.
Eske sala keteıik, búǵan deıin Kaspıı teńiziniń jaǵalaýyndaǵy qamys órtine tikushaqpen 162 tonna sý tógilgenin, qamys órtiniń aýmaǵy 690 gektarǵa jetkenin jazǵan bolatynbyz.
Kaspıı teńiziniń jaǵalaýynda 6 shildeden beri qamys órtenip jatyr.
Atyraý oblystyq tótenshe jaǵdaılar departamenti basshysynyń mindetin atqarýshy Asqat Erjanovtyń málimetinshe, Kaspıı teńiziniń jaǵalaýyndaǵy órttiń tutanǵany keshki saǵat 20:00 shamasynda belgili bolǵan.
«Qamys órti Atyraý qalasyndaǵy Keńózek aýyldyq okrýginen 30 shaqyrym qashyqtyqta tirkeldi. Sol kúni keshkisin órt aýmaǵyn baqylaý úshin 12 qyzmetker jiberildi», -dep málim etken edi Asqat Erjanov.
Keıin Kaspıı jaǵalaýyndaǵy qamys órti 450 gektarǵa jaıylǵanyn jazǵan bolatynbyz.
Sondaı-aq, qamys órtin sóndirýge Qyzylordadan tikushaq tartylatynyn habarlaǵan edik.
Al, keshe jaǵalaýdaǵy qamys órtine tikushaqpen 60 tonnaǵa jýyq sý tógildi.