Kaspıı teńiziniń jaǵalaýyndaǵy 3 gektarda qamys órti áli byqsyp jatyr
Oblystyq tótenshe jaǵdaılar departamentiniń qoǵammen baılanys tobynan málim etkendeı, teńiz jaǵalaýyndaǵy qamys órtin sóndirý jumystary toqtatylǵan joq.
«Tótenshe jaǵdaılar departamentiniń qyzmetkerleri 7 kúnnen beri Kaspıı teńiziniń jaǵalaýyndaǵy qamys órtin joıý jumystaryn jalǵastyryp jatyr. Biraq, bıiktigi 2-2,5 metr qamys órt sóndirý qıyndyq týdyryp tur. Óıtkeni, qamys órti batpaqty jerde tutanǵan. Sol sebepten, órt sóndirý tehnıkalary órt oshaqtaryna jete almaıdy. Bul órt sóndirýshilerdi órt oshaǵyna jaıaý baryp, sapalaqpen sóndirýine májbúr etti. Qamys órtine kún saıyn monıtorıng júrgizilip otyr», -dep habarlady departamenttiń qoǵammen baılanys toby.
«Qazaqstan Ǵarysh Sapary» UK» AQ-nyń ǵaryshtan túsirgen sýretterine qaraǵanda, Kaspıı teńiziniń jaǵalaýyndaǵy qamystyń janyp ketken aýmaǵy 1,5 myńnan astam gektardy quraǵan.
Atyraý oblystyq tótenshe jaǵdaılar departamenti men «Aqjaıyq» memlekettik tabıǵı rezervatynyń qyzmetkerleri bıylǵy 9-15 jeltoqsan aralyǵynda 40 gektardan astam aýmaqqa jaıylǵan qamys órtin sóndirgen.
Qazir qamys órti shamamen 3 gektar aýmaqta byqsyp jatqany anyqtalǵan.
Teńiz jaǵalaýyndaǵy qamys órtin sóndirýge tótenshe jaǵdaılar departamentinen 16 qyzmetker men 1 tehnıka, «Aqjaıyq» memlekettik tabıǵı rezervatynan 12 qyzmetker men 3 tehnıka tartylǵan.
Qamys órtinen eldi mekenderge tónip turǵan qaýip joq.
Eske sala ketelik, budan buryn Kaspıı jaǵalaýyndaǵy tabıǵı rezervatta qamys janyp jatqanyn habarlaǵan bolatynbyz.
Foto: Atyraý oblysy TJD