Kaspıı teńizine alyp aqserkeniń 1 mln-nan astam shabaqtary jiberiledi

ASTANA. QazAqparat - Búgin Astanada ótken baspasóz máslıxatynda QR Aýyl sharýashylyǵy mınıstrligi orman sharýashylyǵy jáne janýarlar álemi komıtetiniń basqarma basshysy Narıman Júnisov Atyraýda ustalǵan 160 kelilik aqserke balyǵynyń qaıda jiberilgenin aıtyp berdi, dep xabarlaıdy QazAqparat tilshisi.

«Sáýirdiń 1-i kúni aqserkeniń urǵashysy ustalǵan bolatyn. Salmaǵy - 160 keli. Barlyǵy sol balyqtyń taǵdyryna qatty alańdady. Osy oraıda sáýirdiń 18-i kúni ol balyqtan 30 keli 600 gramm ýyldyryq alyndy. Ol shamamen 1 mıllıon 200 myń dana ýyldyryq bolady. Sonyń barlyǵyn jasandy jolmen uryqtandyrǵannan keıin ınkýbatsııalyq apparattarǵa ornalastyrdy. Endi, shilde aıynda kádimgideı balyqtardy teńizge jiberetin bolamyz», - dedi Júnisov.

Onyń aıtýynsha, búginde Batys Qazaqstan oblysynda aqserkeni ósiretin eki zaýyt bar. Aǵymdaǵy jylda ol kásiporyndar shamamen 7 mıllıon aqserke balyqtaryn teńizge jiberýdi josparlap otyr.

Aıta keteıik, osy aıdyń basynda Atyraýdaǵy «Amangeldi» óndiristik kooperatıvi salmaǵy 160 keli bolatyn aqserke balyǵyn ustaǵan bolatyn. Balyqtyń uzyndyǵy - 230 santımetr. Osydan tórt jyl buryn atalǵan kooperatıv 300 kelilik aqserkeni ustady degen aqparat bar.

Aıta keteıik, búginde Kaspıı teńizinde balyq aýlaýǵa tyıym salý máselesi qaralyp jatyr. Atyraý men Mańǵystaý oblystarynyń ákimdikteri bul bastanyqoldap otyr.