Kaspıı teńizinde ıtbalyqtardyń neden qyrylǵany áli anyqtalǵan joq - mınıstrlik

NUR-SULTAN. QazAqparat – Bıylǵy 5 aıdyń ishinde Kaspıı teńizi jaǵalaýynan 219 ıtbalyqtyń óleksesi tabyldy, dep habarlaıdy QazAqparat tilshisi QR Ekologııa, geologııa jáne tabıǵı resýrstar mınıstrliginiń deregine súıene otyryp.

«Bıyl sáýir men mamyrda tabylǵan óli ıtbalyqtardyń arasynda eshqandaı aıyrmashylyq joq. Barlyǵynyń da óleksesi ydyrap ketken. Mańǵystaý oblysy ekologııa departamentiniń qyzmetkerleri aýa jáne sýdan synama aldy. Zertteý nátıjesi boıynsha kontsentratsııanyń artyq mólsheri anyqtalǵan joq. Itbalyqtardyń qyrylýyna sebep bolatyndaı zııandy zattar tabylmady. Sonymen qatar gıdrobıologııa jáne ekologııa ınstıtýty ólgen ıtbalyqtardyń uzyndyǵy men salmaǵyn ólsheý, jynysy men jasyn anyqtaý úshin olardyń qabyrshaqtary men tyrnaǵy arqyly zertteý júrgizdi», - dep jaýap berdi mınıstrlik QazAqparattyń resmı saýalyna.

Ekologııa mınıstrliginiń resmı aqparatyna sáıkes ıtbalyqtar qyrylýynyń boljamdy sebebin maýsymda jarııalaý josparlanyp otyr.

Búginde zertteý jumysy jalǵasyp jatyr.

Sondaı-aq, atalǵan vedomstvodan jyl basynan beri 30 mamyrǵa deıin Kaspıı teńizi jaǵalaýynan 219 ıtbalyqtyń óleksesi tabylǵany aıtyldy.

«Buǵan deıin tabylǵan ıtbalyqtardyń qańqalary qatty ydyrap ketkeni habarlandy. Sol sebepti toksıkologııalyq, gıstologııalyq jáne vırýsologııalyq zertteý júrgizý úshin synama alý múmkin bolmady. Osy oraıda mınıstrlik ıtbalyqtar qysta ólgen degen boljam jasap otyr. Tabylǵan ıtbalyqtardyń óleksesi Jaıyq-Kaspıı oblys aralyq basseındik balyq sharýashylyǵy ınspektsııasy jáne jergilikti atqarýshy organdardyń kúshimen sanıtarlyq talaptardy saqtaı otyryp joıylady», - delingen habarlamada.

Eske sala ketsek, bıyl sáýirde Kaspıı teńiziniń Mańǵystaý bóliginen 94 óli ıtbalyq tabyldy.

Araǵa az ýaqyt salyp ıtbalyqtardyń óleksesi taǵy tabylǵan edi.

Odan bólek, taıaýda ıtbalyq ólimine qatysty taǵy bir fakti tirkeldi.