Kaspıı sýynyń tartylýy men ıtbalyqtyń qyrylý sebebin zertteıtin ınstıtýt ashylady

<p>Sý resýrstary jáne ırrıgatsııa mınıstrligi Kaspıı sýynyń tartylýy men ıtbalyqtyń qyrylý sebebin zertteıtin ınstıtýt týraly Úkimet qaýlysynyń jobasyn jarııalady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Mınıstrliktiń baspasóz qyzmeti qujat áli Úkimettiń qaraýynda jatqanyn aıtady.

«Sý resýrstary jáne ırrıgatsııa mınıstrligi tıisti qaýlynyń jobasyn ázirledi. Instıtýt Kaspıı teńiziniń ekologııalyq jáne sý deńgeıiniń tómendeý máselesin, ıtbalyq pen balyqtardyń jappaı qyrylý sebepterin, Kaspıı ıtbalyqtarynyń popýlıatsııasyn saqtaý, ıhtıofaýnany, akvatorııasy men Kaspıı jaǵalaýyn zertteıtin bolady. Sondaı-aq Kaspıı boıynsha shekaralas memleketterdegi áriptestermen ózara tyǵyz is-qımyldy qamtamasyz etý baǵytynda da jumys júrgizedi» delingen vedomstvonyń resmı aqparatynda.

Mınıstrlik málimetinde ınstıtýt Kaspıı teńizi ekojúıesiniń barlyq baǵyttary boıynsha obektıvti jáne táýelsiz aqparat jınaqtaıtyny aıtylǵan. Bul derekter memlekettik jáne jergilikti atqarýshy organdardyń keshendi is-sharalar qabyldaýy úshin negiz bolmaq.

«Memleket basshysy keshendi is-sharalar qabyldaý úshin Mańǵystaý oblysynda Kaspııdi zertteýmen aınalysatyn memlekettik ǵylymı ınstıtýt qurýdy tapsyrdy. Instıtýt ashý - máseleni jan-jaqty zerdeleýge, aýqymdy mindetterdi sheshýge múmkindik beredi», - deıdi Sý resýrstary jáne ırrıgatsııa mınıstri Nurjan Nurjigitov.

Instıtýtty 2023 jyldyń aıaǵyna deıin ashý kózdelgen.