Kaspıı mańyndaǵy memleketter teńizdiń munaımen lastanýyna qarsy birlesip kúresetin bolady

ASTANA. QazAqparat - Búgin Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıttetiniń keńeıtilgen otyrysynda «Kaspıı teńiziniń teńiz ortasyn qorǵaý jónindegi negizdemelik konventsııaǵa Munaımen lastanýǵa ákeletin tosyn oqıǵalar jaǵdaıyndaǵy óńirlik ázirlik, den qoıý jáne yntymaqtastyq týraly hattamany ratıfıkatsııalaý týraly» zań jobasy talqylandy.

Qujatqa Ázerbaıjan, Iran, Qazaqstan jáne Reseıdiń ýákiletti ókilderi 2011 jylǵy 12 tamyzda Aqtaý qalasynda qol qoıǵan bolatyn. Hattamanyń maqsaty - Kaspıı mańy elderiniń munaıdyń tógilýine baılanysty tosyn oqıǵalarǵa den qoıýǵa ázirligin qamtamasyz etý jónindegi jeke nemese birlesken qajetti sharalardy qabyldaýy bolyp tabylady.

Energetıka vıtse-mınıstri Áset Maǵaýovtyń aıtýynsha, zań jobasyna sáıkes Kaspıı mańyndaǵy memleketter teńizdegi munaıdyń tógilýine jáne basqa da oqıǵalarǵa baılanysty aqparattarmen almasatyn bolady. Budan bólek, tótenshe oqıǵalar oryn alǵanda oǵan den qoıý maqsatynda óńirlik josparlar jasalady. Sonymen qatar, teńiz mańyndaǵy árbir memleket múmkindiginshe arnaıy tehnıkalardyń eń az sanymen qamtamasyz etilýge mindetti boldy. Sondaı-aq, eger basqa taraptar suraý salǵanda ondaı tehnıkalardy usyný jáne munaı tógilýmen baılanysty tótenshe jaǵdaılardy joıýǵa Kaspıı mańy memelketteriniń barlyq ujymdyq kúshin paıdalaný múmkindigi qarastyrylady.

Tutastaı alǵanda, hattamany ratıfıkatsııalaý Kaspıı teńizi munaımen lastanǵan jaǵdaıda óńirlik sharalardyń iske asyrylýyn qamtamasyz etýge múmkindik beredi.

Zań jobasy palatanyń qaraýyna jiberildi.