Kaspıı mańy memleketteriniń altynshy sammıti Túrikmenstanda ótedi

AQTAÝ. QazAqparat - Kaspıı mańy memleketteriniń altynshy sammıtin Túrkimenstanda ótkizý usynyldy. Bul usynysty Aqtaý sammıtinde Túrikmenstan prezıdenti Gýrbangýly Berdimuhamedov aıtty, dep habarlaıdy QazAqparat.

Sammıtte qabyldaýshy Qazaqstan tarapyna alǵysyn jetkizgen Túrikmenstan prezıdenti:

«Sammıt qorytyndysyna joǵary baǵa beremiz, ıaǵnı barshamyz úshin mańyzdy qujatqa (Konventsııaǵa) qol qoıyldy. Bul aýqymdy jumystarǵa Kaspıı mańynyń barsha elderi belsendi qatysty. Osy oraıda Konventsııanyń erejeleri tıimdi oryndalady dep senemin», - dedi. 

Sonymen qatar Gýrbangýly Berdimuhamedov Sammıt barysynda qol qoıylǵan besjaqty birqatar qujattardyń mańyzdylyǵyn atap ótti.

«Jalpy, Kaspıı mańy memleketteriniń basshylaryna alǵysymdy aıtqym keledi. Barlyqtaryńyz teńizdegi yntymaqtastyqty damytýǵa eleýli úles qostyńyzdar. Kelesi sammıtti Túrikmenstanda ótkizýdi usynamyn», -dedi ol.  

Budan buryn habarlanǵandaı, Aqtaý sammıtine qatysqan bes eldiń basshylary Kaspııdiń quqyqtyq mártebesi týraly konventsııaǵa qol qoıdy.