Kaspıı mańy elderiniń basshylary qandaı qujattarǵa qol qoımaq

ASTANA. QazAqparat - Aqtaýda ótetin Kaspıı mańy memleketteri basshylarynyń sammıtinde Kaspıı teńiziniń quqyqtyq mártebesi týraly konventsııaǵa qol qoıylatyn bolady. Bul týraly QR Syrtqy ister mınıstrligi Halyqaralyq-quqyqtyq departamentiniń dırektory Arman Isetov málim etti, dep habarlaıdy QazAqparat tilshisi.

«Kaspıı teńiziniń quqyqtyq mártebesine qatysty kelissózder 20 jyldan astam ýaqyt boıy júrgizilgeni belgili. Endi mine sol kelissózderdiń qorytyndysy - negizgi qujatqa qol qoıý. Qujat teńiz akvatorııasyn, Kaspıı teńizi túbin bólýge, bıoresýrstardy qorǵaýǵa, balyq aýlaýǵa, sonymen qatar Kaspıı túbimen qubyr tartýǵa qatysty erejelerdi qamtıdy», - dedi ol BAQ ókilderine.

Onyń aıtýyna qaraǵanda, kezdesýge barlyq Kaspıı mańy elderiniń basshylary keledi dep kútilýde. Sammıt aıasynda birqatar úkimetaralyq kelisimge qol qoıý da josparlanǵan. Qujattar kólik, saýda-ekonomıkalyq yntymaqtastyq, Kaspııdiń qaýipsizdigi, onyń ishinde terrorızmmen, qylmyspen kúres, Kaspıı mańyz memleketterdiń shekaralyq vedomstvolarynyń ózara is-qımyly salalaryndaǵy qarym-qatynastardy qamtıdy.

Sammıt 12 tamyz kúni Aqtaý qalasynda ótedi.