Kaspıı qubyry konsortsıýmy bıyl Qazaqstan bıýdjetine 25 mlrd teńge aýdarady
«2016 jyly Qazaqstan Respýblıkasynyń bıýdjetine 21 mlrd 150 mln teńge aýdarǵan edik. Ústimizdegi jyldyń 9 aıynda bıýdjetke aýdarylǵan qarjy 14 mlrd 610 mln teńgeni qurap otyr. 2017 jylǵa josparlap otyrǵan jalpy boljamymyz - 24 mlrd 970 mln teńge», - dep málimdedi KQK bas dırektory Nıkolaı Gorban Atyraý oblysy Isataı aýdanyndaǵy Kaspıı qubyr jelisi konsortsıýmynyń Shyǵys aımaǵyndaǵy A-NPS-3A jańa munaı aıdaý stantsııasyn saltanatty iske qosý rásiminde.
Kaspıı qubyr jelisi konsortsıýmy qyzmetiniń paıdasy Atyraý oblysyna da tıip otyr.
«Kompanııa qurylǵannan beri óńirdiń áleýmettik-ekonomıkalyq ómirine qolǵabys jasap keledi. Búginge deıin KQK oblystaǵy áleýmettik jobalarǵa 7 mlrd teńge qarjy bólgen. Olar jańa balabaqshalar, mektepter salýǵa áleýmettik-mádenı nysandardy kúrdeli jóndeýge, ınfraqurylymdy damytýǵa baǵyttaldy. Oblys ortalyǵynda jáne aýdandarda 4 jańa áleýmettik nysan boı kóterdi. KQK jýyrda ǵana jańa munaı quıý stansasyn salyp bitirdi. Ol 46 adamdy turaqty jumyspen qamtydy, taǵy 300-den astam adam merdiger uıymdarda jumysty boldy», - dedi oblys ákimi Nurlan Noǵaev.
KQK qubyr júıesi - TMD aýmaǵyndaǵy sheteldik kapıtaldyń qatysýymen júzege asyrylǵan eń iri jobalardyń biri. Onyń Teńiz - Novorossıısk qubyr jelisi 1 511 kılometrge sozylyp jatyr. Osy marshrýt arqyly Qazaqstan eksporttaıtyn búkil munaıdyń úshten ekisi jiberiledi.