Kaspıı qubyry konsortsıýmy aktsıonerleriniń qaryzyn 2020 jylǵa deıin tolyq ótemek

ASTANA. QazAqparat - Kaspıı qubyry konsortsıýmy óz aktsıonerleri aldyndaǵy qaryzyn ishinara ótedi. Negizgi soma men eseptelgen paıyzdar esebine jasalǵan tólem 210 mln AQSh dollaryn qurady, dep habarlaıdy QazAqparat Konsortsıýmnyń baspasóz qyzmetine silteme jasap. 

Aıta keteıik, Kaspıı qubyr konsortsıýmy (KQK) óziniń qarjylyq qyzmetinde aktsıonerler tarapynan anyqtalǵan tólemdi óteýge basymdyq berip keledi.

«Qazirgi kezde basymdyq bolyp 1997 jylǵy qaryz boıynsha («KQK-R» AQ men «KQK-Q» AQ úshin nesıeger retindegi) úkimettik aktsıonerler men óndirýshi kompanııalar zaım sharttaryn jasaýdan týyndaǵan aktsıonerler aldyndaǵy boryshy qarastyrylyp otyr. 2015 jyly bul maqsatqa 1,5 mlrd dollar, al 2016 jyly 1,27 mlrd. dollar jumsalǵan. 2017 jyl basynda óteýge jatatyn soma shamamen 4,49 mlrd dollardy quraǵan. Osylaısha qaryzdaryn qarqyndy túrde qaıtara otyryp, Kaspıı Qubyry Konsortsıýmy 2020 jylǵa qaraı boryshtaryn tolyq ótep, Aktsıonerlerge dıvıdend tóleýge kirisýdi qarastyrady», - delingen baspasóz baıanynda.

Eske sala keteıik, KQK qubyr júıesi TMD aýmaǵyndaǵy energetıka salasynda sheteldik kapıtaldyń qatysýymen iske asyrylatyn asa iri ınvestıtsııalyq jobalardyń biri. Batys Qazaqstannyń munaı ken oryndaryn Novorossııskidegi teńiz termınalymen jalǵastyryp jatqan qubyrdyń uzyndyǵy 1 511 km quraıdy. KQK-nyń Teńiz termınaly aılaqqa shyǵarylatyn qurylǵylarmen jabdyqtalǵan, bul qurylǵylar munaıdy jaǵadan edáýir qashyqtyqta turǵan tankerlerge qolaısyz aýa raıy bolǵanda da qaýipsiz tıeýge múmkindik beredi.