Kaspıı qubyr jelisine táýlik saıyn 260 myń tonnadan astam munaı tıelýde
«Táýlik boıy tıelip jatqan kólemge qatysty aıtatyn bolsaq, qazir eki aılaqtaǵy qurylǵy arqyly 260 myń tonnadan astam munaı tıelip jatyr», - dedi M. Myrzaǵalıev tilshiler suraǵyna jaýap bere otyryp.
Kompanııa basshysy munaı tıeý úsh qurylǵy (VPU) arqyly iske asyrylatynyn jáne onyń ekeýi únemi jumys istep turýy kerek ekenin aıtty. Al úshinshisi rezervte turýy tıis.
«Jaqynda bir qurylǵy iske qosyldy. Qazir Kaspıı qubyr konsortsıýmynda úsh qurylǵynyń ekeýi arqyly munaı tıeý júrip jatyr. Úshinshi qurylǵyny jóndeý boıynsha jumystar bastaldy», - dedi M. Myrzaǵalıev.
Budan buryn habarlanǵandaı, 12 qarashada Kaspıı qubyr konsortsıýmynyń teńiz termınalyndaǵy birinshi qurylǵysy jóndelgeni aıtyldy.
Jaqynda QR Premer-Mınıstri Álıhan Smaıylov Kaspıı qubyr konsortsıýmynda jóndeý jumystary qashan aıaqtalatynyn habarlaǵan edi.
«Qazan aıynda konsortsıýmdaǵy eki qondyrǵyny jóndeýdi aıaqtaý josparlanǵan bolatyn. Biraq aýa raıyna baılanysty bul jumystar toqtatyldy. Meniń oıymsha, aldaǵy eki-úsh kúnde teńizdegi №1 qondyrǵyny jóndeý jumystary aıaqtalady. Odan keıin birden ekinshi qondyrǵyny jóndeý bastalady. Ony jóndeý shamamen eki-úsh aptada aıaqtalady», - dedi Á. Smaıylov Senattyń otyrysynan keıingi baspasóz máslıhatynda.
Foto: svetland-oil.kz