Kaspıı qubyr konsortsıýmynyń jumysy qaıta jandandy

ASTANA. QazAqparat – Teńiz – Novosibir munaı qubyrynda 72 saǵattyq josparly irkilisten keıin munaı aıdaý qaıta jandandy. Bul týraly QazAqparat Kaspıı qubyr konsortsıýmynyń saıtyna silteme jasap habarlaıdy.

«Kórsetilgen kezeńde munaı qubyrynyń ártúrli júıelerine, munaı aıdaý stantsııalaryna jáne teńiz termınalyna (mehanıkalyq-tehnologııalyq jabdyqtar, energetıkalyq jáne elektr jabdyqtary, baqylaý-ólsheý aspaptary men avtomatıka júıeleri, basqarý júıeleri) reglamenttik tehnıkalyq qyzmet kórsetý, sondaı-aq konsortsıýmnyń aǵymdaǵy jáne kúrdeli jobalary boıynsha jumystar júrgizildi. Ol jumystardy sorǵy stantsııalar men munaı qubyrlaryn toqtatqanda ǵana oryndaýǵa bolady», - dep jazylǵan resmı saıtta.

Qubyrdyń Qazaqstandaǵy bóliginde munaı aıdaý toqtatylǵan kezeńde «Teńiz» munaı aıdaý stansasynda órt pen gaz anyqtaý júıesin jańǵyrtý jumystary júrgizilgen. Sondaı-aq «Atyraý» munaı aıdaý stansasynda elektrmen jabdyqtaý júıesin jańǵyrtýǵa baılanysty jumystar oryndaldy. Qubyrdyń ótkizý qabileti tar tustaryn keńeıtý jobasynyń aıasynda árqaısysy 20 myń m3 kólemindegi eki jańa rezervýar salý jobasy qolǵa alynyp otyr. Bul rezervýarlardy 2023 jyly iske qosý josparlanǵan.

«Qubyrdyń jumysyndaǵy josparly irkilister jylyna birneshe ret júrgiziledi. Kaspıı qubyr konsortsıýmy munaı qubyrynyń jumysyn toqtatý týraly málimetterdi sarapshylar men qoǵamǵa aldyn ala habarlamaıdy. Bul qaýipsizdik maqsatymen jáne qubyrdy syrttan kesý táýekelimen baılanysty», - delingen konsortsıýmnyń baspasóz qyzmetiniń málimetinde.

Qazirgi tańda teńiz termınalynda munaı jóneltý shtattyq rejımde júrip jatyr.