Kaspıı qubyr konsortsıýmynyń teńiz termınalyndaǵy birinshi qurylǵysy jóndeldi

ATYRAÝ. QazAqparat – Kaspıı qubyr konsortsıýmy Qara teńiz jaǵalaýyndaǵy teńiz termınalynyń birinshi aılaǵyndaǵy qurylǵyny jóndeýdi tolyq aıaqtady. Munda gıdrostatıkalyq synaqtar oryndalǵan, dep habarlaıdy QazAqparat tilshisi.

Kaspıı qubyr konsortsıýmynyń bas dırektory Nıkolaı Gorbannyń aıtýynsha, teńiz termınalyndaǵy birinshi aılaq qurylǵysynda qalqymaly tankini aýystyrý jumystary tolyq aıaqtalǵan. Qazir qurylǵy iske qosyldy.

«Qazir merdiger kompanııa VPU-2 qurylǵysyn jóndeýge qatysty daıyndyq jumystaryn júrgize bastady. Bul qurylǵyny jóndeý jumysynyń aıaqtalý merzimine boljam jasaý óte qıyn. Óıtkeni, mundaǵy aýa raıy qubylmaly bolyp tur. Bul teńiz termınalynda belgili bir parametrlerdi qalyptastyrady. Sol sebepten, aýa raıynyń qubylmalylyǵy qurylǵyny jóndeý jumystaryna belgili bir áserin tıgizedi», - dep málim etti Nıkolaı Gorban.

Onyń dereginshe, tamyzda sý asty qurylǵyny júzý tankilerine bekitý toraptarynda jaryqtar tabylǵan. Keıin eki aılaqtaǵy qurylǵylardan ónim jóneltý toqtatylǵan.

«Osy kezge deıin munaı jóneltý tek VPU-3 qurylǵysy arqyly júzege asyryldy», - deıdi N. Gorban.