Kaspıı qubyr konsortsıýmynda jóndeý jumystary nege sozyldy: Mınıstr túsindirdi

ASTANA. QazAqparat - QR Energetıka mınıstri Bolat Aqsholaqov Kaspıı qubyr konsortsıýmyndaǵy jóndeý jumystary merziminiń uzaqqa sozylý sebebin atady, dep habarlaıdy QazAqparat tilshisi.

«Buǵan deıin jóndeý jumystary qazan aıynyń sońynda aıaqtalady dep boljaǵan edik. Ókinishke oraı olaı bolmady. Qazir jaǵdaı túsiniksizdeý. Birinshiden, jumysqa qajetti arnaıy kemeni aýystyrýǵa ýaqyt ketti. Onyń ústine muny shuǵyl túrde jasaý kerek bolatyn. Ádette mundaı úlgidegi jabdyqqa aldyn ala kelisimshart jasalady. Kemeni jetkizýge biraz ýaqyt ketti. Álemde logıstıkanyń kúrdelengenine qaramastan ony jetkizdik», - dedi mınıstr Senattyń jalpy otyrysynan keıin BAQ ókilderiniń saýalyna oraı.

Onyń atap ótýinshe, qosymsha súńgýir jabdyqtardyń tapshylyǵy da oryn alǵan.

«Ony da jetkizdik. Modýldy aýystyrý ońaı emes, gıdrosynaq júrgizý qajet. Munyń barlyǵy sýdyń astynda jasalady. Aýa raıyn basqara almaımyz. Daýyl turǵan sát súńgýirdiń densaýlyǵyna qaýipti bolýy yqtımal. Jalpy, bul qaýipti jumys túri. Tolqyn kóterile bastaǵan sátte olar sýǵa túse almaıdy. Qazir gıdrosynaq júrgizilip jatyr», - dedi Bolat Aqsholaqov.

Foto: svetland-oil.kz