Kaspıı qubyr konsortsıýmy munaı eksportynyń basym baǵyty bolyp qala beredi – mınıstr

NUR-SULTAN. QazAqparat – QR Energetıka mınıstri Bolat Aqsholaqov Ázerbaıjan arqyly Qazaqstan munaıyn eksporttaýdyń keleshegi týraly paıymyn aıtty, dep habarlaıdy QazAqparat tilshisi.

Ázerbaıjan arqyly qazirgi marshrýttardan artylǵan munaıdy eksporttaý qaralyp jatyr - mınıstr

«Munaı eksportynyń balama joldary týraly suraq qoıylǵan saıyn aıtyp júrmiz. Búgingi tańda Kaspıı qubyr konsortsıýmy Qazaqstan munaıyn eksporttaýdyń utymdy joly bolyp otyr. ıAǵnı, eń negizgi mindet – osy marshrýttyń irkilissiz jumys isteýin qamtamasyz etip, Qazaqstan munaıyn eksporttaýdyń ornyqty kanalyn ustap turý. Bul el ekonomıkasynyń ósimi úshin óte mańyzdy», - dedi vedomstvo basshysy.

Sondaı-aq ol Ázerbaıjan arqyly ótetin marshrýttyń Kaspıı qubyr konsortsıýmyna balama retinde qarastyrylyp otyrmaǵanyn aıtty.

«Balama jol degende aldaǵy eki jylda iri kenishterdiń esebinen, jańa shaǵyn ken oryndaryn taýyp, qoldanysqa berý esebinen munaı óndirisiniń kólemin arttyrmaqshymyz. Sonda bıylǵy jospar - munaı óndirisiniń kólemi 85,7 mln tonnaǵa jetkizý bolsa, keleshekte bul kórsetkish 103 mln, tipti 107 mln tonnaǵa deıin jetýi múmkin degen boljam bar. Bul qazir eksportqa jóneltetin munaıdan áldeqaıda kóp. Sonda biz artylǵan kólemdi jóneltip úlgerýdiń, irkilissiz tasmymaldaýdyń qosymsha joldary týraly oılanýymyz kerek. Sondyqtan biz ózge balama marshrýttardy qarastyryp otyrmyz», - dep túsindirdi mınıstr.

Aıtýynsha, Qazaqstan munaıyn Kaspıı arqyly balama jolmen tasymaldaýdyń eki baǵyty bar.

«Bul marshrýt boıynsha Ázerbaıjan da, Iran da áriptestik usyna alady. Ár marshrýttyń óz ereksheligi bar. Irandy aıtsaq, kúshi joıylmaǵan sanktsııalar máselesi bar. Sonda da ol baǵytty qarastyryp jatyrmyz. Al eksporttalatyn munaıdyń bir bóligin Kaspıı arqyly Ázerbaıjanǵa jóneltý tehnıkalyq málese dep aıtýǵa bolady. Sondaı-aq bul jerde úlken kólem týraly áńgime joq. Jańaǵy aıtyp otyrǵan artylýy yqtımal kólemderdi jóneltý kózdelip otyr. Sondyqtan Kaspıı qubyr konsortsıýmynyń irkilissiz jumys isteýi basym baǵyt bolyp qalady. Sonymen qatar qosymsha parallel marshrýttar jolǵa qoıylmaq. Bul munaı óndirisiniń kólemi artýyna baılanysty qolǵa alynady», - dedi Bolat Aqsholaqov.

Foto: gov.kz