Kaspıı qubyr konsortsıýmy 2023 jyly munaıdy kóbirek tasymaldaýǵa daıyn

ATYRAÝ. QazAqparat – Kaspıı qubyr konsortsıýmy 2023 jyldyń basynan bastap munaıdy kóbirek tasymaldaıdaýǵa daıyn. Bul týraly konsortsıým basshysy Nıkolaı Gorban málim etti, dep habarlaıdy QazAqparat.

Kaspıı qubyr konsortsıýmy Kaspıı qubyr konsortsıýmynyń bas dırektory Nıkolaı Gorbannyń aıtýynsha, qazir qubyrdyń munaı ótkizý qýatyn arttyrýǵa serpin eretin negizgi jumystar atqarylyp jatyr. Bul jumystyń bıylǵy jeltoqsanda aıaqtalatyny josparlanǵan.

«Konsortsıým 2023 jyldyń basynan bastap qubyrmen tasymaldanatyn munaıdy kóbirek qabyldaýǵa daıyn bolady. Qazir osyǵan baılanysty qolǵa alynǵan arnaıy baǵdarlamany iske asyrýdyń birneshe mańyzy bar. Birinshiden, bul ónim aıdaý pýnktterindegi jumys rejıminiń ıkemdiligin jaqsartady. Ekinshiden, munaıdyń qosymsha kólemin frıktsııaǵa qarsy qospanyń ońtaıly mólsherimen, qubyrdy paıdalanýdyń tıisti koeffıtsıentterimen aıdaýdy qamtamasyz etýge múmkindik beredi. Osyndaı jumystyń nátıjesinde Qazaqstan aýmaǵynan jylyna 72,5 mln tonnaǵa, al, Reseı Federatsııasynan jylyna 83 mln tonnaǵa deıin munaı tasymaldaýǵa jol ashylady», -dep málim etti Nıkolaı Gorban.

Eske sala ketelik, budan buryn Kaspıı qubyr konsortsıýmynyń teńiz termınalyndaǵy birinshi qurylǵysy jóndelgenin jazǵan bolatynbyz.

Keıin Kaspıı qubyr jelisine táýlik saıyn 260 myń tonnadan astam munaı tıelip jatqany habarlanǵan edi.