Kaspıı qubyr konsortsıýmynyń teńiz termınalynda tankerlerge munaı tıeý qaıta bastaldy

<p>Qara teńiz jaǵalaýyndaǵy Novorossıısk portynyń termınalynda tankerlerge munaı tıeý qaıta bastaldy, dep habarlaıdy <a href="https://kaz.inform.kz/news/elmzdeg-tagi-br-r-kompaniya-munay-ondru-kolemn-azaytti-43c30e/" target="_blank" rel="noopener">Kazinform.</a></p>

Kaspıı qubyr konsortsıýmynyń telegram arnasynda habarlanǵandaı, buǵan deıin Novorossıısk porty kapıtanynyń daýylǵa jáne qolaısyz aýa raıyna baılanysty eskertýinen keıin teńiz termınalynda tankerlerge munaı tıeý toqtatylǵan. Búgin, 30 qarashada termınalda tankerlerge munaı tıeý qaıta bastaldy. 

«Qalqymaly shlangiler men aılaq mańyndaǵy qurylǵylarǵa tekserý júrgizildi. VPÝ-3 qurylǵysynyń syrtqy bóligindegi qalqymaly shlanginiń zaqymdanǵany anyqtaldy. Daýyldyń saldarynan shlang búgilgen. Osyǵan baılanysty qorshaǵan ortany qorǵaý jáne ónerkásiptik qaýipsizdikti qamtamasyz etý, onyń ishinde, munaıdyń tógilýine, avarııalyq jaǵdaılardyń týyndaýyna jol bermeý maqsatynda VPÝ-3 qurylǵysy paıdalanýdan shyǵaryldy. Munaı tógilgen joq. Tótenshe jaǵdaı týyndamady. Turǵyndarǵa, Qara teńizdiń florasy men faýnasyna qaýip tónbedi», - dep habarlady Kaspıı qubyr konsortsıýmynyń baspasóz qyzmeti. 

Qazir teńiz termınalynda munaıdy jóneltý VPÝ-1 jáne VPÝ-2 qurylǵylary arqyly shtattyq rejımde júzege asyrylyp jatyr. 

«VPÝ-3 qurylǵysyndaǵy qalqymaly shlangilerdiń búlingen sektsııalaryn aýystyrý aýa raıynyń qolaıly kezinde qolda bar qosalqy bólshektermen júzege asyrylady. Qalqymaly shlangtyń zaqymdalǵan sektsııalary aýystyrylǵannan keıin VPÝ-3 qurylǵysynyń paıdalanýǵa berilgeni týraly qosymsha habarlanady», - dep málim etti konsortsıýmnyń baspasóz qyzmetinen. 

Eske sala ketelik, budan buryn Qazaqstandaǵy taǵy bir kompanııa munaı óndirý kólemin azaıtqanyn habarlaǵan bolatynbyz. 

Keıin taǵy bir iri kompanııa munaı óndirý kólemin azaıtqanyn jazǵan edik.