Kaspıı qubyr konsortsıýmyna baılanysty sanktsııa máselesi týyndady — Devıd O’Sallıvan

<p>ASTANA. KAZINFORM &mdash; Eýropalyq Odaqtyń sanktsııalar jónindegi arnaıy ókili Devıd O&rsquo;Sallıvan Astanada ótken baspasóz konferentsııada Qazaqstan tarapynda Reseıge salynǵan sanktsııalarmen baılanysty birneshe másele týyndaǵanyn málim etti.</p>

«Sanktsııalar máselesine baılanysty aıtsaq, Qazaqstan tarapynda birneshe másele týyndady. Qazir osy máselelerdi talqylap jatyrmyz. Áńgime Kaspıı qubyr konsortsıýmynyń fýnktsıonaldyǵy men qyzmet etýimen baılanysty boldy. Qazaqstan Eýropalyq Odaq naryǵyna iri munaı eksporttaýshy bolyp esepteledi. Biz ony óte qatty baǵalaımyz», - dedi Devıd O’Sallıvan.

Sondaı-aq, ol Eýrazııa damý bankindegi aktıvterdiń buǵattalýy týraly sóz qozǵady.

«Taǵy bir basty máseleniń biri Eýrazııa damý bankindegi buǵattalǵan aktıvter edi. Bul máselemen bilek sybanyp aınalystyq, sonyń arqasynda belgııalyq áriptesterdiń kómegimen atalǵan aktıvterdi buǵattan shyǵara aldyq. Endi bul aktıvter Qazaqstanda iske asyrylatyn jobalarǵa baǵyttalady», - dedi Eýropalyq Odaq ókili.

Devıd O’Sallıvan Qazaqstanǵa osymen úshinshi ret kelip otyrǵanyn eske saldy. 

«Bizdi alańdatyp otyrǵan másele Qazaqstannan Reseı Federatsııasyna sanktsııa salynǵan taýarlardyń reeksporttalýy múmkin ekendigimen baılanysty. Biz Qazaqstanǵa taýarlar ımporty aıtarlyqtaı óskenin kórip otyrmyz jáne ol qosymsha baǵyttalýy múmkin ekenine alańdaýlymyz. Biz áýel bastan Qazaqstannyń sanktsııalarǵa qosylmaıtyny týraly sheshimin qurmetteý týraly ustanymyz bar ekenin málimdegenimizdi jáne sanktsııalarǵa qosylýdy eshqashan ótinbegenimizdi aıqyndap aıtqym keledi. Bar surap otyrǵanymyz – Qazaqstan aýmaǵy arqyly úlken jetilik elderi engizgen sanktsııalardy aınalyp ótýge jol berilmeýin qamtamasyz etý. Biz Qazaqstannyń bulaı bolmaıtynyna jáne áskerı maqsattaǵy buıymdar Reseıge qosymsha baǵyttalmaıtynyna sendirip, kepildik bergenine razymyz», - dedi Devıd O'Sallıvan.