Kaspıı qubyr konsortsıýmy teńiz termınalyndaǵy bir qondyrǵynyń jumysyn toqtatty

<p>ATYRAÝ. KAZINFORM &ndash; Kaspıı qubyr konsortsıýmynyń Qara teńiz jaǵalaýynda ornalasqan termınalynda bir qondyrǵynyń jumysy toqtap tur.&nbsp;</p>

Bul týraly búgin konsortsıýmnyń baspasóz qyzmeti habarlady. Teńiz termınalyndaǵy VPÝ-2 qondyrǵysynyń jumysyn toqtatýǵa josparly jóndeý sebep bolǵan.

«Qazirgi ýaqytta jer ústi jáne sý astyndaǵy shlangilerdi aýystyrý maqsatyndaǵy josparly jumystarǵa baılanysty VPÝ-2 paıdalanýdan shyǵaryldy. Jóndeý jumystary aıaqtalǵannan keıin osyndaı is-shara VPÝ-1 qondyrǵysynda da júrgiziletin bolady», - dep habarlady konsortsıýmnyń baspasóz qyzmeti.

Belgili bolǵandaı, 2024 jyldyń basynan beri Qara teńiz aılaǵyndaǵy termınalda 192 tankerge 21,1 mıllıon tonna munaı tıelgen.

Eske sala ketelik, budan buryn Kaspıı qubyr konsortsıýmynyń magıstraldyq qubyrymen munaı tasymaly toqtatylǵanyn jazǵan edik.

Keıin Kaspıı munaı konsortsıýmy Qazaqstan munaıyn jóneltýdi qaıta bastady.