Kaspıı qubyr konsortsıýmy aılaǵynda shlang aýystyrý 60 kúnge sozylady

<p>ATYRAÝ. KAZINFORM — Kaspıı qubyr konsortsıýmy Qara teńiz jaǵalaýyndaǵy aılaqta VPÝ-3 qondyrǵysynyń 27 shlangisin aýystyrýdy kózdep otyr. Bul jumys shamamen 60 kúnge sozylady.</p>

Konsortsıýmnyń Telegram arnasyndaǵy aqparatqa súıensek, keshe, 29 shildede teńiz termınalyndaǵy VPÝ-2 qondyrǵysynda munaıdy tankerlerge tıeý qaıta bastaldy.

Bul qurylǵydaǵy josparly jóndeý jumysy 24 shildede aıaqtalǵan. Sodan keıin júk tıeý protsesi aldynda gıdrosynaq júrgizilgen. 

«2024 jylǵy 28 shildede VPÝ-3 jabdyǵyn josparly profılaktıkalyq jóndeý jumystaryna daıyndaý bastaldy. Munda sýasty qubyrynyń termınaldyq kollektory (OPTM) jabyldy. Al, VPÝ-3 qurylǵysy paıdalanýdan ýaqytsha shyǵaryldy. Onda tankerdiń kómegimen shaıý jumysy atqaryldy», -dep habarlady konsortsıýmnyń baspasóz qyzmeti.

Belgili bolǵandaı, VPÝ-3 qurylǵysynda 27 shlangini aýystyrý kózdelip otyr.

Onyń ishinde sý astynda qoldanylatyn 12 jáne júzbeli 15 shlang bar.

Bul operatsııa aýa raıy qolaıly bolyp tursa, shamamen 60 kúnge sozylady.

Eske sala ketelik, buǵan deıin Kaspıı qubyr konsortsıýmy Qazaqstannan 56 mln tonna munaı tasymaldaǵanyn habarlaǵan bolatynbyz.