Kaspıı konventsııasyna qol qoıýdyń Qazaqstan keleshegi úshin mańyzy qandaı
«Samıtten dámemiz zor. Kaspıı teńiziniń quqyqtyq mártebesi jóninde konventsııa jobasy 25 jyl boıy kelisilip kele jatyr jáne bul másele barlyq bes tarap úshin mańyzdy boldy. Biz sońǵy ýaqytta taraptardyń pozıtsııalary jaqyndaı túskenin baıqadyq. Bul bátýalastyqqa alyp keledi dep úmittenemiz. Ótken jyldyń jeltoqsan aıynda konventsııa jobasy jasalyp, búginde qazaqstandyq dıplomattarmen qatar sheteldikter de Aqtaý sammıtinde konventsııaǵa qol qoıylatyny týraly abaılap qana aıtyp júr», - dedi QSZI halyqaralyq zertteýler bóliminiń aǵa ǵylymı qyzmetkeri.
Onyń aıtýynsha, kelissóz júrgizý protsesiniń basynda keıbir qatysýshylar qatań pozıtsııa ustanyp, keı máselelerde qarama-qaıshy pikir bildirgen.
«Ózara talqylap, kelisýdi qajet etetin kóptegen ózgeshelikter boldy. Bul turǵyda Qazaqstannyń pozıtsııasy BUU-nyń 1982 jylǵy halyqaralyq teńiz quqyǵy jónindegi Konventsııasynyń Kaspıı teńiziniń erekshe mártebesin kórsetetin ózgeshelikterin paıdalanýǵa negizdelýimen tıimdi boldy. Kaspıı - erekshe teńiz, sondyqtan oǵan jalpylaı qaraýǵa bolmaıdy. Qazaqstan taraptardyń pozıtsııalaryn jaqyndastyrý úshin kóp jumys jasady», - dedi maman.
Qujatqa qol qoıýdyń Qazaqstannyń keleshegine áseri jaıynda aıtar bolsaq, Reshetnıak elimizdiń tranzıttik áleýetiniń artýyna zor múmkindikter týatynyn erekshe atap ketti.
«Konventsııa jobasy álemdik teńizge shyǵa almaıtyn ishki elderge jol ashyp beredi. Mysaly, Iran arqyly Parsy shyǵanaǵyna attanýǵa bolady. Bul tranzıttik turǵydan alyp qaraǵanda, jańa múmkindikter týatynyn kórsetedi. Kaspıı túbi boıymen qubyr jelisin salý týraly qaıta kelissózder ótýi ábden múmkin», - dep túıindedi A. Reshetnıak.