Kaspıı ıtbalyǵyn saqtaý úshin erekshe qorǵalatyn tabıǵı aýmaq qurý josparlanýda – mınıstrlik
«Ǵylymı derekterge sáıkes Kaspıı teńizinde shamamen 300 myń ıtbalyq bar. Sol sııaqty Kaspıı ıtbalyǵynyń joıylyp ketý qaýpine qatysty eshqandaı dáleldi negiz joq. ıAǵnı ǵalymdardyń pikirinshe ıtbalyqtardyń joıylý qaýpiniń jaqyn bolashaqta bolýy ekitalaı. Qazirgi ýaqytta gıdrobıologııa jáne ekologııa ınstıtýty Kaspıı teńiziniń Qazaqstanǵa qarasty bóliginde ıtbalyqtardyń ónip-ósýi, olardy saqtaý men taralýyna qatysty ǵylymı-zertteý jumystary júrip jatyr. Sonymen qatar ǵylymı zertteý nátıjesin qorytyndylaı kele atalǵan ınstıtýt ıtbalyqtar mekendeıtin jerlerdi saqtaýǵa qatysty usynystar jasaıdy», - dep jazylǵan QazAqparattyń resmı saýalyna berilgen jaýapta.
Mınıstrliktiń habarlaýynsha, Qazaqstan Kaspıı ıtbalyǵyn saqtaý jáne kóbeıtýge qatysty 2026 jylǵa deıingi Reseımen birlesken is-qımyl josparyna qol qoıdy.
«Josparǵa sáıkes Kaspıı ıtbalyǵynyń mekendeý jáne kóbeıýin saqtaý úshin erekshe qorǵalatyn tabıǵı aýmaq qurý josparlanýda. Aıta ketsek, osydan 3 jyl buryn Aqtaýda Kaspıı ıtbalyǵyn zertteý jáne ońaltý boıynsha Qazaqstandaǵy alǵashqy ortalyq ashyldy. Búginge deıin ortalyqta 40-tan astam ıtbalyqty emdep, ońaltyp tabıǵı ortaǵa qaıta jiberildi», - delingen habarlamada.
Eske sala ketsek, bıyldyqqa Kaspıı teńizindegi ıtbalyqtardyń qyrylýyna qatysty birneshe jaǵdaı tirkeldi.
Alǵash sáýir aıynda Kaspıı teńiziniń Mańǵystaý bóliginen 94 óli ıtbalyq tabylǵan edi.
Ekologııa mınıstrligi usynǵan aqparatqa sáıkes bıyl 5 aıdyń ishinde Kaspıı teńizi jaǵalaýynan 219 ıtbalyqtyń óleksesi tabyldy.
Sondaı-aq atalǵan vedomstvo Kaspıı teńizinde ıtbalyqtardyń qyrylý sebebiniń áli anyqtalmaǵanyn jetkizdi.