Kaspıı ıtbalyǵy Qazaqstannyń Qyzyl kitabyna endi

NÚR-SULTAN. QazAqparat – Kaspıı ıtbalyǵy Qazaqstannyń Qyzyl kitabyna engizildi. Búgin QR Ekologııa, geologııa jáne tabıǵı resýrstar mınıstri Maǵzum Myrzaǵalıev osy máselege qatysty pikirin bildirdi, dep habarlaıdy QazAqparat.

Mınıstrdiń sózinshe, Kaspıı ıtbalyǵynyń Qazaqstannyń Qyzyl kitabyna enýi janýardyń popýlıatsııasyn saqtap qalýǵa múmkindik beredi.

«QR Úkimetiniń Qaýlysymen Kaspıı ıtbalyǵy Qyzyl kitapqa endi. Bul shara sany sońǵy júz jylda 1 mln-nan 100 myńǵa azaıǵan janýardyń popýlıatsııasyn saqtap qalýǵa múmkindik beredi»,- dep jazdy M. Myrzaǵalıev.

Ekologııa mınıstri janýar popýlıatsııasyn saqtaý úshin qabyldanyp jatqan sharalar týraly da aıtty.

«Qazaqstanda teńiz sútqorektisin saqtap qalý boıynsha birqatar sharalar qabyldanyp jatyr. Ótken jyldan beri Aqtaý qalasynda Kaspıı ıtbalyqtaryn zertteý jáne reabılıtatsııalaý Ortalyǵy quryldy. Reseı Federatsııasyndaǵy áriptesterimizben birge zertteý júrgizip, ıtbalyq popýlıatsııasyn saqtaý boıynsha birlesken áreket etý josparyn ázirlep jatyrmyz»,- dedi mınıstr.

Ol sonymen birge qazaqstandyqtardy joǵalyp bara jatqan janýarlarǵa qamqor bolýǵa shaqyrdy.

«Jaralanǵan ıtbalyqtardy kórgende joǵaryda atalǵan Ortalyqqa habarlasýlaryńyzdy ótinemiz»,- dep jazdy M.Myrzaǵalıev.

Kaspıı ıtbalyǵy basqa Kaspıı mańy elderiniń Qyzyl kitaptaryna engizilip qoıǵan.