Kaspıı ıtbalyqtary rezervatynyń qurylýyna baılanysty Mańǵystaý oblysynyń shekarasy keńeıedi
Mańǵystaýda oblystyq máslıhattyń VIII shaqyrylym depýtattary kezekten tys toǵyzynshy sessııada aımaqtyń ákimshilik shekarasyn ózgertý týraly másele qarady.
Mańǵystaý oblysy jer qatynastary basqarmasy basshysynyń mindetin atqarýshy Batyrbek Tájimuhanov Kaspıı ıtbalyqtary úshin memlekettik tabıǵı rezervat qurý kezinde oblys shekaralaryn keńeıtý qajet ekenin aıtty, dep habarlaıdy Mańǵystaý oblysy ákiminiń baspasóz qyzmeti.
«Kaspıı teńiziniń 12 mıl akvatorııasyn qosý josparlanýda. Bul aýmaqty qosý Memleket basshysynyń Kaspıı ıtbalyqtary úshin tabıǵı rezervat qurý jónindegi tapsyrmasynyń oryndalýyn qamtamasyz etýge qajet», — dedi Batyrbek Tájimuhanov.
Tabıǵı rezervat Mańǵystaý oblysynyń shekarasy men Kaspıı teńizindegi 12 mıldik beldeý arasyndaǵy aýmaqta ornalasatyn bolady. Kaspıı teńizindegi qosylatyn aýmaqtyń jalpy aýdany 1 mln. 487,4 myń gektardy quraıdy.
«Máslıhat búgin shekara boıynsha sheshimdi bekitti. Tabıǵı rezervattyń shemalyq kartasyn QR „Ákimshilik-aýmaqtyq qurylys týraly“ Zańyna sáıkes derekterdi kórsete otyryp, ázirlegennen keıin jáne QR tsıfrlyq damý, ınnovatsııalar jáne aeroǵarysh ónerkásibi mınıstrliginiń mamandary aldyn ala qaraǵan soń, Qazaqstan Respýblıkasynyń Úkimetine kelisýge jiberiledi» — dep túsindirdi Batyrbek Tájimuhanov.
Oblys shekaralaryn belgileý jáne teńizdiń 12 mıldik aımaǵyn ákimshilik basqarýǵa qosý ıtbalyqtar popýlıatsııasynyń saqtalýyn qamtamasyz etip qana qoımaı, Kaspıı teńizi jaǵalaýynda týrızmniń damýyna yqpal etedi. Bul óz kezeginde óńirdiń turaqty ekonomıkalyq damýyn yntalandyratyn bolady.
Óńir basshysy Nurlan Noǵaev Kaspıı teńizinde rezervat qurý — ıtbalyqtar popýlıatsııasyn saqtaýdyń bir joly ekenin jáne bul arnaıy qorǵalatyn qoryq aımaǵy bolatynyn atap ótti
«Kaspıı teńizinde turatyn ıtbalyqtardyń endemıkterine qatysty alańdaýshylyq bar. Búgin biz osy teńiz sútqorektilerin saqtaý úshin oblys aýmaǵyna 12 mıldik sý aımaǵyn qosý múmkindigin talqyladyq. Jyl saıyn ıtbalyqtyń kúshikteri sanynyń azaıýy baıqalady. Kaspıı ıtbalyǵy Qazaqstannyń Qyzyl kitabyna engizilgen jáne olardyń sany jyldan jylǵa azaıýda. Mamandar qazirgi jaǵdaıǵa qatysty úlken alańdaýshylyq tanytyp otyr. Janýarlardyń azaıýy olardyń joıylyp ketý qaýpin týdyrady. Biz óz quzyretimiz sheginde ekologııa mınıstrligimen jáne basqa da ortalyq memlekettik organdarmen yntymaqtastyqta Kaspıı teńizinde rezervat qurý múmkindigin qarastyramyz», — dep atap ótti Nurlan Noǵaev.
Eske sala keteıik, prezıdent Qasym-Jomart Toqaev 2021 jyldyń qyrkúıeginde Kaspıı teńiziniń soltústiginde Kaspıı ıtbalyǵynyń popýlıatsııasyn saqtaý úshin rezervattar qurýdy usynǵan bolatyn.
Sol kezde memleket basshysy Kaspıı ıtbalyqtarynyń popýlıatsııasy máselesi óte ózekti ekenin, osy biregeı janýardy saqtaý, olardyń mekendeý ortasy men sanyn arttyrý jóninde sharalar qabyldaý qajet ekenin aıtqan bolatyn.