«Kaspıı – dostyq teńizi» motosherýine qatysýshylar Mańǵystaýǵa keldi
Motosherýdiń basty maqsaty - Kaspıı mańy elderiniń yntymaqtastyǵyn nyǵaıtý.
Shetelden kele jatqan motokerýen búgin Aqtaý qalasyna jetti. Qatysýshylardy Mańǵystaý oblysynyń ákimi Nurlan Noǵaev jáne Qazaqstan halqy Assambleıasynyń ókilderi men jastar, ártister erekshe qurmetpen qarsy aldy.
«Búgin Astrahan qalasynan jol tartqan motokerýen Aqtaý qalasyna jetti. Bul sherý Kaspıı mańynda ornalasqan memleketterdiń beıbitshiligin nyǵaıtady degen senimdemin. Sondaı-aq, motosherý qatysýshylarǵa jańa múmkindikterge jol ashady. Ádemi tabıǵatymyzdy kóredi. Memlekettik qyzmet jáne bıznes ókilderimen, oblys basshylarymen tanysady. Qazirgi tańda barlyq memleket ashyqtyqty qoldaıdy. Óıtkeni kez-kelgen kezdesý adamnyń oı-órisin keńeıtedi, beıbitshilik pen dostyqqa baǵyttaıdy» - dedi Mańǵystaý oblysynyń ákimi Nurlan Noǵaev.
Astrahandyqtar 2023 jyldyń 1-11 sáýir aralyǵynda Qazaqstannyń Atyraý men Aqtaý qalalaryn basyp ótip, Túrikmenstannyń Túrikmenbashy men Ashhabad shaharlaryna sapar shegedi. Budan keıin kósh basyn Irannyń Babolser men Resht jáne Ázerbaıjannyń Astara men Baký sııaqty iri qalalaryna burý kózdelgen. Motosherý músheleri Daǵystan Respýblıkasynyń aýmaǵy arqyly Astrahanǵa ótip, saparyn aıaqtaıdy. Eń uzyn jol 905 shaqyrymdy quraıtyn Atyraý men Aqtaý arasy, al eń qysqa jol 360 shaqyrymǵa sozylǵan Astrahan men Atyraý arasy ekendigin atap ótken jón.
«Astrahan - Kaspııdiń Reseı enshisindegi mańyzdy geostrategııalyq aýmaǵy jáne eldiń syrtqy saıasatynyń basty baǵyttaýshysy. Biz barlyq Kaspıı mańy elderimen yntymaqtastyqty belsendi damytyp jatyrmyz. Ekonomıkada da, gýmanıtarlyq salada da kóptegen birlesken jobalarymyz bar. Bizdiń óńirden bastaý alǵan motosherý «Kaspıı bestiginiń» arasyndaǵy beıbitshilikti, dostyq pen kelisimdi órkendete túsýine qyzmet etetinine senimdimin» - dedi Astrahan oblysynyń gýbernatory Igor Babýshkın.