Kaspıı «bestigi» tranzıttik baǵyttardy damytý jol kartasyn qabyldaıdy - Álıhan Smaıylov

MÁSKEÝ. QazAqparat – Aqtaý porty «Soltústik-Ońtústik» jáne «Shyǵys-Batys» kólik dálizderiniń negizgi elementine aınalýǵa qabiletti. Bul týraly Qazaqstan Premer-mınıstri Álıhan Smaıylov II Kaspıı ekonomıkalyq forýmynyń plenarlyq otyrysynda sóılegen sózinde málim etti, dep habarlaıdy QazAqparat menshikti tilshisi.

Úkimet basshysy Kaspıı óziniń geografııalyq ornalasýyna jáne biregeı tranzıttik áleýetine baılanysty halyqaralyq saýdany damytýda mańyzdy ról atqaratynyn atap ótti. Ol kúsh-jigerdi birlesip qoldanýdyń mańyzdy baǵyttarynyń biri kólik ınfraqurylymyn damytý jáne halyqaralyq saýdany keńeıtý dep atady.

«Qazaqstan Soltústik-Ońtústik jáne Shyǵys-Batys kólik dálizderiniń áleýetin arttyratyn transshekaralyq habtardy qalyptastyrý boıynsha aýqymdy josparlar belgiledi. Bul: Aqtaý jáne Quryq teńiz porttary, Qorǵas «qurǵaq porty», «Ortalyq Azııa» halyqaralyq ónerkásiptik kooperatsııa ortalyǵy jáne basqalar. Atalǵan habtar Kaspıı elderimen jáne odan ári halyqaralyq naryqtarmen saýda aǵyndarynyń keńeıýine yqpal etedi», - dedi Álıhan Smaıylov.

Premer-Mınıstr sondaı-aq Memleket basshysynyń Aqtaý portyndaǵy iri kólik-logıstıkalyq ortalyqqa aınalýy múmkin Kaspıı mańy azyq-túlik habyn qurý týraly bastamasyna da toqtaldy.

Bul rette ol óńiraralyq saýdanyń áleýetin tolyq ashý úshin óńirdiń kólik baılanysyn jaqsartý qajet ekenin atap ótti. Máselen, tranzıttik jáne eksporttyq júkterdiń mańyzdy baǵyttarynyń biri – «Soltústik-Ońtústik» dálizi.

«Bul – Parsy shyǵanaǵy elderine baratyn eń qysqa jol. Sonymen qatar, Úndistannan bizdiń baǵytqa áleýetti júkter bar. Aqtaý porty «Úndistan – Parsy shyǵanaǵy elderi – Iran – Qazaqstan – Reseı» baǵytynda torapqa aınalýy múmkin», - dedi Á.Smaıylov.

Sondaı-aq, mınıstrler kabınetiniń basshysy Eýropa, Ortalyq Azııa jáne Qytaı arasyndaǵy júk aǵyndaryn keńeıtý úshin Transkaspıı halyqaralyq kólik marshrýtyndaǵy «tar» jerlerdi damytý jáne sınhrondy túrde joıý qajettigin málimdedi.

«Qazaqstan óńirdiń tranzıttik áleýetin nyǵaıtý boıynsha birlesken is-qımyldarǵa kirisýge daıyn. Biz áriptestermen bul jumysty qazirden bastaımyz, tıisti jol kartasyn ázirlep, tranzıttik marshrýttarymyzdyń áleýetin keńeıtýge kirisemiz dep kelistik», - dep atap ótti ol.

Kaspıı ekonomıkalyq forýmy – Kaspıı óńiri elderi yntymaqtastyǵynyń ózekti máselelerin talqylaýǵa arnalǵan eń iri alań. Olardyń negizgileri – saýda-ekonomıkalyq baılanystar men kólik-logıstıkalyq ınfraqurylymdy damytý. Forým aıasynda dóńgelek ústelder, plenarlyq otyrystar, konferentsııalar jáne basqa da is-sharalar ótkiziledi. Ekinshi KEF-ke Kaspıı «bestigi» elderinen, sondaı-aq Belarýs, Qyrǵyzstan jáne Ózbekstannan 1000-nan astam delegat qatysady.

Narynbek Ysmaǵulov