Kaspıı aýmaǵy elderi arasynda ǵylymı zertteýler boıynsha kelisim daıyndalyp jatyr

<p>Bul týraly Sý resýrstary jáne ırrıgatsııa mınıstri Nurjan Nurjigitov vıtse-mınıstrler men birqatar departament dırektorlarynyń qatysýymen Kaspıı teńizin saqtaý máseleleri boıynsha ótken apparat keńesi barysynan málim boldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, jıynǵa qatysýshylar Kaspııdiń sý deńgeıiniń tómendeý máselesi jáne bul baǵytta júrgizilip jatqan jumystardy talqylady.

Vıtse-mınıstr Bolat Beknııaz sý deńgeıiniń eń tómengi kórsetkishi 1970 jyldardyń ortasynda tirkelgenin, al tómendeý kóbinese tsıkldik sıpatta bolatynyn aıtty.

Vıtse-mınıstr Kaspıı teńiziniń ǵylymı-zertteý ınstıtýtyn qurý barysy týraly da aıtyp berdi. Instıtýt sý deńgeıiniń monıtorıngi jáne Kaspıı ekojúıesin zertteýmen aınalysatyn, sondaı-aq Kaspıı jaǵalaýyndaǵy ózge memleketterimen ózara tyǵyz is-qımyldy qamtamasyz etetin bolady.

Halyqaralyq yntymaqtastyq Kaspıı teńiziniń ortasyn qorǵaý jónindegi Negizdemelik konventsııaǵa sáıkes ótetin bolady. Sondaı-aq, barlyq Kaspıı aýmaǵy elderi arasynda ǵylymı zertteýler boıynsha kelisim daıyndalyp jatyr.

Qazirgi ýaqytta ınstıtýt qurý týraly qaýly jobasy daıyndalyp jatyr, sondaı-aq respýblıkalyq bıýdjettik komıssııasynyń qaraýyna shyǵarylatyn qarjy-ekonomıkalyq negizdeme ázirlenýde. Mınıstr óz kezeginde barlyq qajetti qujattardy daıyndaýdy jedeldetýdi tapsyrdy.

Vıtse-mınıstr Nurlan Aldamjarov mınıstrlik janynan Kaspıı teńizi jáne jaǵalaýyndaǵy barlyq memlekettermen ózara is-qımyl máselelerimen aınalysatyn Sý yntymaqtastyǵy basqarmasy ashylatynyn habarlady. Al, Transshekaralyq ózender departamenti Kaspııdiń negizgi salasy bolyp tabylatyn Edil ózeni boıynsha belsendi jumys júrgizetin bolady.

«Másele kúrdeli, sondyqtan qurylyp jatqan ǵylymı-zertteý ınstıtýtynan Qazaqstan úshin ǵana emes, Kaspıı jaǵalaýyndaǵy basqa memleketter úshin de ózekti máselelerdi zertteý boıynsha keshendi jumys talap etiledi. Jańadan qurylǵan halyqaralyq yntymaqtastyq, sý saıasaty jáne ǵylym men ınnovatsııa departamentteri jınaqtalǵan máselelerdi sheshý joldaryn tabý úshin bir-birimen tyǵyz jumys isteýi kerek. Biz shekaralas memleketterdegi áriptesterimizben birge jumys isteıtin bolamyz»,- dedi Sý resýrstary jáne ırrıgatsııa mınıstri Nurjan Nurjigitov.