«Kaspi», «Kazakhmys» - SQO-da tasqynnan zardap shekkenderdiń úılerin kim salyp beredi

<p>ASTANA. KAZINFORM &ndash; Soltústik Qazaqstan oblysy ákimi apparatynyń jumyldyrý daıyndyǵy jáne azamattyq qorǵaý bóliminiń basshysy Serik Ǵaısın Soltústik Qazaqstan oblysynda tasqynnyń saldaryn joıý sharalary qalaı uıymdastyrylyp jatqanyn aıtty.</p>

«Óńirde 3 898 úıdi sý alǵan, qazir sonyń 2830-y áli sýda tur. Barlyǵy 14 388 adam qaýipsiz jerge kóshirilgen bolatyn. Qazir 5 567-si úılerine qaıtyp bardy. 8 821 adam áli baspanasyna kirgen joq. Tasqynnan zardap shekkenderge kómek berý jónindegi arnaıy komıssııalarǵa 3 897 ótinish túsken. 3 443 otbasy 100 AEK (369 200 teńge – red.) kólemindegi bir rettik kómek aldy, tólengen aqshanyń jalpy somasy 1 mlrd 271 mln teńgege jetti. Qazirge deıin óńirde 390 úı tekserilip, 148 úıdi baǵalaý júrgizildi. Onyń 23-i qaıta jóndeýge jaramdy, 7-ýi jaramsyz dep tanyldy», - -dedi ol ortalyq kommýnıkatsııalar qyzmetinde ótken brıfıngide.

Sondaı-aq, ákimdik ókili Petropavl qalasyndaǵy Solnechnyı-2 shaǵyn aýdanyna erekshe toqtaldy.

«Solnechnyı-2 shaǵyn aýdanynda tasqynnan zardap shekkenderge úı salynyp jatyr. 10 jergilikti qurylys kompanııasy «Qazaqstan halqyna» qorynyń qarajatyna 100 úı salyp jatyr. Sondaı-aq, «Kaspi» aktsıonerlik qoǵamy 300 úı, «Kazakhmys» korporatsııasy 100 úı salyp jatyr. Shaǵyn aýdanda 500 úı jańadan salynady», - dedi Serik Ǵaısın.