Kaspi Bank tonaýshylar týraly aqparat bergenderge 5 mıllıon teńge bermek
«Kaspi Bank 22 tamyz kúni Talǵar qalasyndaǵy bólimshege qaraqshylyq shabýyl jasaýǵa qatysy bar qylmyskerlerdi ustaýǵa múmkindik beretin mańyzdy aqparatty usynǵandarǵa 5 mıllıon teńge syıaqy beredi. Bul aqparatty banktiń Qaýipsizdik qyzmetine +7 747 388 29 34 telefony arqyly habarlaýǵa bolady», - dep jazylǵan habarlamada.
Aıta ketý kerek, keshe Kaspi bank-tiń Almaty oblysynyń Talǵar qalasynda ornalasqan bólimshesine qaraqshylyq shabýyl jasaldy. Beınebaqylaý kamerasyna túsken kadrda betine betperde kıgen eki adam ǵımarattyń tóbesinen túsedi. Olardyń biri bank qyzmetkerleriniń qoldaryn baılaýmen aınalysyp jatqanda, ekinshisi kassadaǵy aqshany sómkege sala bastaıdy. Qaraqshylardyń qansha aqsha alyp ketkeni ázirge belgisiz. Banktiń baspasóz qyzmetinen málim etkendeı, qaraqshylyq shabýyl kezinde ǵımaratta bank klıentteri bolmaǵan. Bank qyzmetkerleri zardap shekken joq.
«Olar dereý dabyl tetigin basyp, tártip saqshylaryna habar berdi. Qazir oqıǵa ornynda polıtseıler jumys istep jatyr. Banktiń qaýipsizdik qyzmeti qylmyskerlerdi anyqtaý úshin barlyq aqparatty berip, tártip saqshylarymen belsendi jumys isteýde. Naqty qansha qarjy tonalǵany anyqtalýda», - delingen Kaspi banki baspasóz qyzmetiniń taratqan málimdemesinde.