Kaspi Bank ǵımaratyn basyp alǵan jigit onyń aldynda ózin óltirý úshin dári ishken

ASTANA. QazAqparat – Bıyl maýsymda qarýlanǵan belgisiz er adam elordadaǵy Kaspi Bank ǵımaratyna shabýyl jasaǵan edi. Bul jaǵdaı qoǵamdy dúrliktirip, oqıǵa ornyna elimizdiń Іshki ister mınıstri men elorda ákimi keldi. Búgin is boıynsha alǵashqy sot otyrysy ótti, dep habarlaıdy QazAparat tilshisi.

Aıta ketsek, zardap shegýshiler men aıyptynyń advokaty sot protsesin vıdeoǵa túsirýge qarsy shyqty, al aıypty Álıhan Mýradov túsirilimge qarsylyq bildirmedi.

Sottalýshyǵa taǵylǵan aıypty prokýror Aqshoraev oqydy.

«Tergeý nusqasyna sáıkes, Á. Mýradov dári-dármek qoldaný arqyly ózin-ózi óltirý jóninde sheshim qabyldaǵan. Biraq preparattyń qajetti áserin almaǵandyqtan bankti basyp alý josparyn oılap tapty. Ol bankten muqtaj jandarǵa qarajat talap etkisi keldi, sodan keıin ony ustaý kezinde qyzmetkerler atyp tastaıdy dep oılady. Á. Mýradov qolda bar quraldardan jarylǵysh qurylǵynyń mýlıajyn jasady. Syılyq dúkeninen jeńil tapansha satyp alǵan. Sol arqyly bank bólimshesine shabýyl jasap, bank qyzmetkerlerin kepilge aldy. Osylaısha Á. Mýradov QR Qylmystyń kodekstiń 261-baby, 4-tarmaǵynyń 2-bóliginde kózdelgen áreketke bardy (kepilge alý)», - dep atap ótti ol.

Sot barysynda zardap shekkenderdiń de pikiri tyńdaldy.

«Shynymdy aıtsam, men jáne basqa da kepilge alynǵan qyzdar psıhologııalyq turǵydan qatty qorqyp qaldyq. Sondyqtan aıyptyny keshirdim dep aıta almaımyn, sheshimdi sottyń qalaýyna qaldyramyn», - deıdi jábirlenýshi Anastasııa Lýkıanova.

Óz kezeginde aıyrtalýshy keshirim surady.

«Keshirim suraǵym keledi. Eshkimge zııanymdy tıgizgim kelmedi», - dedi óz kezeginde Álıhan Mýradov sot aldynda.

Eske sala ketsek, bıyl 18 maýsymda qarýlanǵan er adam elordadaǵy Kaspi bank ǵımaratynda birneshe kisini tutqynda ustap otyrdy.

Araǵa ýaqyt salyp atalǵan banktiń baspasóz qyzmeti ǵımaratta klıentterdiń joqtyǵyn jáne polıtsııa qyzmetkerleriniń kúdiktimen kelissóz júrgizip jatqanyn málimdedi.

Oqıǵa ornyna Іshki ister mınıstri Marat Ahmetjanov baryp, kúdiktige qatysty tergeý amaldary júrip jatqanyn málim etti.

Óz kezeginde polıtsııa qyzmetkerleri kepildegi azamattardy bosatty.

23 tamyzda Kaspi Bank ǵımaratyna jasalǵan shabýyl boıynsha qylmystyq is sotqa jetkenin habarlaǵan edik.