Kaspi Bank aktsıonerleri jańa holdıng qurdy
«Kaspi» aktsıonerlik qoǵamy Kaspi Bank aktsııalarynyń 90% janama ıesi bolady. «Kaspi» AQ holdınginiń aktsıonerleri men ınvestorlary bolyp Vıacheslav Kım, Qaırat Satybaldyuly, Mıhaıl Lomtadze jáne Berıng Vostok Kepıtal Partners halyqaralyq ınvestıtsııalyq kompanııasynyń basqarýyndaǵy qorlar tabylady. «Biz jańa Kaspi holdıngin qurdyq, - deıdi Kaspi Bank dırektorlar keńesiniń tóraǵasy Vıacheslav Kım. - Holdıngte eki jańa aktsıoner - meniń uzaq jyldardan bergi dosym, seriktesim Qaırat Satybaldyuly jáne 10 jyldan beri bıznes qalyptastyrýdaǵy seriktesim, Kaspi Bank-tiń basqarma tóraǵasy Mıhaıl Lomtadze. Qazirgi kezde Kaspi Bank holdıngtiń negizgi aktıvi bolyp tabylady jáne biz seriktesterimizben birge qyzyqty, ınnovatsııalyq jańa jobalarǵa ınvestıtsııa salýdy josparlap otyrmyz». «Biz bolashaqtyń jańa tehnologııalar men ınnovatsııalarda ekenine senemiz. Qazirgi kezde biz Kolesa.kz, Alseko jáne Kaspi Bank sııaqty kompanııalardyń aktsıonerimiz. Bizdiń josparymyzda ary qaraı bizdiń ómirimizdi jeńildetetin, ınnovatsııalyq jáne tehnologııalyq kompanııalardyń damýy úshin ınvestıtsııa salý bar», - deıdi Kaspi Bank-tiń basqarma tóraǵasy Mıhaıl Lomtadze. «Biz jańa aktsıonerler men seriktesterdi, Mıhaıl Lomtadze men Qaırat Satybaldyulyny qarsy alamyz. Bul bizge bankte nemese odan tys jerdegi bizdiń ınnovatsııalyq qyzmetterdi damytýǵa baǵyttalǵan uzaq merizimdi strategııamyzdy júzege asyrýǵa múmkindik beredi. Bizdiń josparlarymyzdy tabysty júzege asyrý úshin úlken múmkindikterimiz ben tájirıbemiz bar», - deıdi Berıng Vostok Kepıtal Partners-tiń basqarýshy seriktesi Maık Kalvı. Qazirgi kezde Qaırat Satybaldyuly men Mıhaıl Lomtadzeniń úlesi 10%-dan tómen. Jaqyn arada eki aktsıoner de iri qatysýshy mártebesin alýdy jáne 10% astam úleske ıe bolýdy josparlaýda.