Qaskeleń kóshelerinde zańsyz kókpar uıymdastyrǵandar ustaldy
18:21, 17 Mamyr 2022
TALDYQORǴAN. QazAqparat - Almaty oblysy Qarasaı aýdany Qaskeleń qalasynda zańsyz kókpar uıymdastyrǵandar ustaldy, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, kókpardy 66 jastaǵy Qaskeleń turǵyny jıeniniń týǵan kúnine oraı uıymdastyrǵan.
Ulttyq oıyn qalanyń shetki aýmaǵynda bolǵan. Biraq artynsha qala kóshelerinde jalǵasqan.
«Ustalǵan adamdar ákimshilik jaýapkershilikke, ıaǵnı, usaq buzaqylyq jáne kólikterge kedergi keltirý boıynsha jaýapkershilikke tartylady. Sonymen qatar, polıtsııa kókpardyń ózge de qatysýshylaryn izdestirip jatyr. Onyń ishinde 34 jastaǵy turǵynnyń kóligin búldirgen adam da bar»,- delingen Almaty oblystyq polıtsııa departamenti baspasóz habarlamasynda.
Esterińizge sala keteıik, Qaskeleńde zańsyz kókpar uıymdastyrǵandardy polıtsııa izdep jatqanyn habarlaǵan bolatynbyz.