Kaskader Erbol Semqulov Bakýde qazaqstandyq «Alǵa» fılmin usyndy
10-11 jeltoqsan kúnderi Baký turǵyndary «Nızamı» kınoteatrynda qalyń kópshilikke usynylǵan qazaqstandyq eki fılmdi tamashalady. Qazaqstandyq týyndyny kórýge kelgender is-sharany uıymdastyrýshylarmen jáne akterlarmen tildesý múmkindigine ıe boldy.
Qazaqstandyq kıno kúnderiniń ashylý rásiminde QR Elshisi Serjan Ábdikárimov sońǵy jyldary elimizdiń kınoındýstrııany damytýǵa zor kúsh salyp jatqandyǵyn atap ótti.
Dıplomat Qazaqstannyń Ázerbaıjandaǵy kúnderi aıasynda elimizdiń fılmderiniń kórsetilýi baýyrlas elder arasyndaǵy baılanysty nyǵaıtatynyna senim bildirdi.
Qazaqstandyq kıno kúnderiniń alǵashqy kúninde Ivan Ardashovtyń «Kenje qyz» fılmi Baký turǵyndarynyń yqylasyna bólendi.
Mýltıplıkatsııalyq týyndyda kezdeısoq qııal áleminen tabylǵan kishkentaı qyzdyń úıine oralý úshin zulymdyqpen qalaı kúreskeni baıandalady.
Ivan Ardashevtiń sózinshe, festıvaldi uıymdastyrýshylar Bakýge eki el arasynda shyǵarmashylyq jáne dıplomatııalyq qarym-qatynastar qalyptastyrý úshin kelgen.
«Kıno men anımatsııa salasynda bizge uqsas, ortaq qundylyqtar kóp jáne olardy nasıhattaı bergen jón. Sondaı-aq aıyrmashylyqtar da bar, olardy ásirese eki ulttyń tilinde áńgimeleskende erekshe qyzyq bolyp shyǵady. Biz osyndaı qundylyqtar arqyly eki eldiń baılanystary men qarym-qatynasyn odan ári nyǵaıtyp, birlesken ónimder shyǵarýǵa bolatynyn kórsetý úshin keldik», - dedi jas rejısser.
Ol osy ýaqytqa deıin 5 qysqametrajdy fılm men 1 serıal túsirgenin, aldaǵy ýaqytta komandasy «Qorqyt ata» atty tolyqqandy jańa anımatsııalyq fılmniń jobasymen aınalysyp jatqanyn atap ótti.
Ekinshi kúni kınosúıer qaýym «Alǵa» fılminiń dramalyq sıýjetin tamashalady. Bas rólderdi akterler, Nomad Stunts kásibı kaskaderlary Jandos Aıbasov pen Erbol Semqulov oınaıdy.
Fılmde ózderiniń ómirin sportpen baılanystyryp, kenetten taǵdyrdyń jazýymen isti bolyp kete jazdaǵan qarapaıym eki aýyl balasynyń ómiri baıandalady.
Erboldyń sózinshe, fılm avtorlary jastarǵa shyn nıet bolsa oılaǵanyńa jetýge bolatynyn, eń qıyn degen armannyń ózi oryndalatynyn uǵyndyrý boldy.
Jas kaskader fılmdi túsirý kezinde dene kúshimen kóp jumys isteý qajet bolǵanyn atap ótti.
«Bizge jaqsy dýbl túsirý úshin bir áreketti birneshe ret qaıtalap júgirý qajet boldy. Al meniń básekelesim nıgerııalyq kásibı fýtbolshy. Soǵan qaramastan biz qıyndyqty eńserdik. Buǵan Jandos ekeýmizdiń ózara jaqsy qarym-qatynasymyz yqpal etti dep oılaımyn. Biz Nomad Stunts-te 15 jyldan beri kaskader bolyp jumys istep kelemiz»,-dedi Erbol.
Sondaı-aq ol sózinde buryn kásipqoı bokspen aınalysyp, QR quramasynda fýtbol oınaǵanyn atap ótti.
Qazaqstannyń kıno kúnderi QR Mádenıet mınıstrliginiń, Kazakhcinema Memlekettik qazaq kınosyn qoldaý ortalyǵy men Qazaqstannyń Bakýdegi elshiliginiń qoldaýymen «Nızamı» kınoteatrynda ashyldy.
Serikbol Qoshmaǵambetov.