Kásipter atlasy negizinde oqytý baǵdarlamalary engizilýde

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi men QR Bilim jáne ǵylym mınıstrligi Qazaqstan Respýblıkasyndaǵy jańa kásipter men quzyretterdiń atlasyn elimizdiń joǵary oqý oryndarymen ári kolledjderimen belsendi ıntegratsııalaýdy jalǵastyýda. Qazirgi ýaqytta taý-ken metallýrgııa, munaı-gaz jáne IT salalary úshin bilim berý baǵdarlamalary ázirlenip otyr, dep habarlaıdy QazAqparat.

«Qazaqstandyq eńbek naryǵy úshin ázirlengen jańa kásipter men quzyretterdiń atlasy ekonomıkanyń 9 negizgi salasyn qamtıdy jáne jańa, transformatsııalanatyn, sondaı-aq joıylyp bara jatqan kásipter men quzyretterdi biriktiredi. Atlas – bul ekonomıka salalaryn damytýdyń álemdik trendterin eskere otyryp, halyqaralyq tájirıbege negizdelgen jáne forsaıt-zertteý aıasynda óndiris, memlekettik organdar, salalyq qaýymdastyqtar jáne basqa da ókilderi atynan salalyq sarapshylardyń qatysýymen júrgizilgen zertteýlerdiń qorytyndysy», - delingen Eńbek mınıstrligi málimetinde.

Negizgi salalar úshin júrgizilgen jumystardyń arqasynda (munaı-gaz salasy, aýyl sharýashylyǵy, kólik jáne logıstıka, mashına jasaý, aqparattyq-kommýnıkatsııalyq tehnologııalar, energetıka, týrızm, qurylys, taý-ken metallýrgııa salasy) taıaýdaǵy 5-10 jylǵa kásipterdegi ózgerister boljanyp, sondaı-aq 239 jańa, 95 transformatsııalanatyn jáne 129 joıylyp bara jatqan kásip aıqyndaldy.

Otandyq eńbek naryǵynyń trendteri men perspektıvalarynan qalys qalmaý úshin Eńbekmıni men BǴM atlasty Qazaqstannyń joǵary oqý oryndarymen jáne kolledjderimen ıntegratsııalaý boıynsha belsendi jumys júrgizip jatyr.

«2021 jylǵy 21 qańtarda BǴM-niń Atlas nátıjelerin eskere otyryp ózektendirilgen «Tehnıkalyq jáne kásiptik, orta bilimnen keıingi bilimniń mamandyqtary men biliktilikteriniń jikteýishin bekitý týraly» buıryqqa ózgerister men tolyqtyrýlar engizý týraly» buıryǵy qabyldandy. Máselen, Hromtaý taý-ken tehnıkalyq joǵary kolledji Atlas negizinde «Pılotsyz avıatsııalyq júıelerdi tehnıkalyq paıdalaný jónindegi tehnık-mehanık» jańa biliktiligi boıynsha eksperımenttik bilim berý baǵdarlamasyn ázirleýde», - dep atalyp ótken mınıstrlik habarlamasynda.

«Astana polytechnic college» joǵary kolledji «Kıberqaýipsizdik» baǵyty boıynsha baǵdarlama ázirlep jatyr, «Semeı» kolledji «Operator VR AR MR» baǵyty boıynsha daıarlap otyr.

Atyraý Munaı jáne gaz ýnıversıteti kelesi baǵyttar boıynsha stýdentterdi oqytýǵa daıyndalýda: «Munaı-gaz salasynyń jańa jaǵdaılaryndaǵy basqarý»; «Aqyldy ken orny, úlken derekter jáne jasandy ıntellekt»; «Munaı-gaz salasyndaǵy jańa materıaldar tehnologııalary»; «Munaı-gaz salasyndaǵy tehnıkany qashyqtan basqarý»; «Tehnıkalyq qyzmet kórsetý men jóndeýdegi bolashaq tehnologııalary».

Budan basqa, Atyraý Munaı jáne gaz ýnıversıteti Qazaqstan-Brıtan tehnıkalyq ýnıversıtetimen birlesip, bıyl «Jabdyqtyń senimdiligi jáne boljamdy analıtıkasy jónindegi ınjener» jáne «Pılotsyz ushý apparattarynyń operatory» degen 2 mamandyqty synaqtan ótkizetin bolady.

Jańa bilim berý baǵdarlamalary eńbek naryǵynyń naqty suranystaryna jaýap retinde kadrlardy daıarlaý júıesin ózgerte alady jáne qysqa merzimde sapaly kásibı kadrlardy daıarlaýǵa múmkindik beredi. Elektrondyq eńbek bırjasy (enbek.kz) portalynda Jańa kásipter men quzyretterdiń atlasymen tanysýǵa bolady.