Kásiporyndardyń eńbek ónimdiligin arttyrý ındýstrııalandyrýdyń mańyzdy mindetteriniń biri - vıtse-premer
Bul týraly búgin BNews.kz portalynda ótken online-konferentsııada vıtse-premer-ındýstrııa jáne jańa tehnologııalar mınıstri Áset Isekeshev aıtty, dep habarlaıdy QazAqparat.
Onyń sózine qaraǵanda, eńbek ónimdiligin arttyrýda eki baǵytqa aıryqsha nazar aýdarylatyn bolady. Birinshisi -qoldanystaǵy kásiporyndardy jańartý. Ekinshisi- ónimdiligi joǵary jańa kásiporyndardy qurý.
«Memleket basshysy ındýstrııalandyrý baǵdarlamasynda, bıylǵy Joldaýynda eńbek ónimdiligin arttyrýda ekonomıkalyq saıasattyń mańyzdy mindetteriniń biri retinde belgiledi. Eńbek ónimdiligi ártúrli sektorlardaǵy, ártúrli kásiporyndardaǵy, ártúrli óńirlerdegi ekonomıkanyń tıimdiligin kórsetedi. Sondyqtan da mınıstrlikter men vedomstvolardyń maqsattary men mindetterin aıqyndaıtyn barlyq baǵdarlamalarǵa, barlyq qujattarǵa eńbek ónimdiligi maqsatty ındıkator retinde engiziletin bolady. Bul baǵytta qyrýar jumys kútip tur», dedi Vıtse-Premer.
Onyń sózine qaraǵanda, salystyrmaly túrde aıtqanda birqatar sektorlarda Qazaqstan bir adamǵa shaqqandaǵy eńbek ónimdiligi jaǵynan álemdik kóshbasshylardan anaǵurlym qalyp qoıǵan. Sondyqtan, eńbek ónimdiligin arttyrý úshin qazirden bastap sharalar qabyldaý qajet. Barlyq kásiporyndar eńbek ónimdiligin arttyrýlary tıis. Deıturǵanmen, vıtse-premer Qazaqstanda sońǵy jyldary qurylǵan mashına jasaý zaýyttaryndaǵy bir adamǵa shaqqandaǵy eńbek ónimdiliginiń deńgeıi damyǵan elderdegiden kem túspeıtinin atap kórsetti. «Oǵan Astanadaǵy lokomotıv qurastyratyn zaýytty mysal retinde keltirýge bolady», dedi ol.