Kásiporyndar jalaqynyń esebinen óz tabysyn arttyryp otyr - Kásipodaqtar federatsııasy
«Aldynda bir konferentsııada spıkerlerdiń bireýi kásiporyndardyń jalpy shyǵyndaryn tanystyrǵan bolatyn. Sonda jalaqyǵa ketetin aqshanyń azaıǵany kórsetildi. Sońǵy on bes jyldyń ishinde kásiporyndar jalaqyǵa bóletin aqshany 52 protsentten 37 protsentke deıin azaıtty. Bul neniń belgisi? Demek, kásiporyndar jumysshylardyń esebinen óz tabystaryn arttyryp otyr», - dedi B.Ábdiraıym Astanada ótken jıynda.
Onyń aıtýynsha, atalǵan úrdis anyq baıqalady. Al Belarýs pen Reseı sııaqty kórshi memleketterde kásiporyndardyń jalaqyǵa jiberetin jalpy shyǵyndary 50 protsentten tómen túsken joq. «Sondyqtan bul máselege tereń qaraý qajet. Kásiporyndar jumysshylardyń jalaqysyn bir mejede bekitip qoıady da, óz tabystaryn arttyryp otyrady. Al keıbir taýar men qyzmetterge suranys ósip keledi. Demek, baǵa da joǵary. Baǵa kóterilgende tabys jaqsy túsedi. Jalaqy bolsa, bir deńgeıde qalyp otyr», - dep atap kórsetti B.Ábdiraıym.
Aıta keteıik, búgin Astanada «Qazirgi áleýmettik-eńbek qatynastary. Qazaqstannyń teorııasy men is-tájirıbesi» taqyrybynda konferentsııa ótti. Sol jerde QR Kásipodaqtar federatsııasy men Respýblıkalyq advokattar alqasy ózara yntymaqtastyq týraly memorandýmdy rásimdedi.