Kásiporyndar qymbat tehnologııadan arzan jumys kúshin tıimdi kóredi – Kásipodaq federatsııasy

NUR-SULTAN. QazAqparat – QR Kásipodaq federatsııasynyń tóraǵasy Satybaldy Dáýletalın Eńbek jáne halyqty áleýmettik qorǵaý mınıstrliginiń keńeıtilgen alqa májilisinde kásiporyndardyń eńbek ónimdiligin arttyrýǵa múddelý bolmaý sebebin atady, dep habarlaıdy QazAqparat tilshisi.

«Bizdiń zańnamada eńbek quqyǵyn qamtamasyz etýge qajetti quqyqtyq arsenaldar jetkilikti. Biraq is júzinde eńbek quqyǵynyń belgilengen kepildikteri men olardy iske asyrý múmkindikteriniń arasynda alshaqtyq bar ekenin kórip júrmiz. Oǵan jyl saıyn kásipodaq uıymdaryna eńbek quqyqtarynyń buzylǵany týraly jumysshylardan kelip jatatyn aryz-shaǵymdar kýá. Elimizde jaldamaly jumysshylardyń eńbek quqyqtaryn saqtaý men qorǵaýdyń kóptegen syn-tegeýrinderi bar», - dedi federatsııa basshysy.

Onyń baıqaýynsha, jumys berýshiler jaldamaly eńbekke ketetin shyǵyndy únemdeý úshin eńbek zańnamasyndaǵy normalardan jıi aýytqıtyn kórinedi.

«Eńbekaqynyń stagnatsııasy men eńbek tabysynyń tómendeýi halyqtyń erteńgi kúnge degen senimin azaıtyp jatyr. Óıtkeni kúrdeli ekonomıkalyq jaǵdaılarda jumys berýshilerdiń kóbi eńbek salasyndaǵy ózgeristerge daıyn bolmaı shyqty. Jumys berýshiler jaldamaly eńbekke ketetin shyǵyndy únemdeý úshin eńbek zańnamasyndaǵy normalardan jıi aýytqıdy. Keıde bul quqyq salasyndaǵy biliksizdikten de týyndap jatady. Qalaı bolǵanda da bul jumysshylardyń múddesine zııan keltiredi. Jumysshylar eńbek qatynasyndaǵy barynsha az qorǵalǵan tarap bolyp otyr.

Kompanııalar bıznesin damytý úshin tenologııalardy aýystyrý arqyly eńbek ónimdiligin arttyrýdyń ornyna arzan eńbekke arqa súıeýge beıim. Qarapaıym tilmen aıtqanda, jańa qondyrǵylar alyp, qomaqty kapıtal salǵysy kelmeıdi. Odan da arzan jumys kúshin paıdalanýdy durys dep sanaıdy», - dedi Satybaldy Dáýletalın.