Kásipodaqtar men advokattar birigip jumys isteýge kelisti

ASTANA. QazAqparat - QR Kásipodaqtar federatsııasy men Respýblıkalyq advokattar alqasy ózara yntymaqtastyq týraly memorandýmdy rásimdedi, dep xabarlaıdy QazAqparat tilshisi.

Kásipodaqtar federatsııasynyń tóraǵasy Baqytjan Ábdiraıymnyń aıtýynsha, memorandým aıasynda zańgerler jumysshylarǵa kómek kórsetip, barlyq ózekti máseleler boıynsha keńes beredi.

«Jumysshylarǵa kómektesip qana qoımaı, olardyń quqyqtaryn da qorǵaıtyn bolady. Ashyǵyn aıtý kerek, búginde jumysshylardyń barlyǵy birdeı qyzmette bolsyn, ujymda bolsyn, óz quqyqtaryn qorǵaı almaı júredi. Bireýdiń quqyqtyq saýattylyǵy tómen bolsa, endi bireýlerge qarjylyq jaǵdaı qolbaılaý jasaıdy jáne taǵysyn taǵy. Sol sebepti biz Respýblıkalyq advokattar alqasymen birlesip barlyǵyna kómek berýdi kózdeımiz. Osy jumysqa oblystyq sottar da atsalysady», - dedi B.Ábdiraıym jýrnalısterge bergen suxbatynda.

Memorandýmǵa Respýblıkalyq advokattar alqasynyń atynan osy uıymnyń basshysy Ánýar Túgel qol qoıdy.

Aıta keteıik, búgin QR Kásipodaqtar federatsııasynyń uıymdastyrýymen «Qazirgi áleýmettik-eńbek qatynastary. Qazaqstannyń teorııasy men is-tájirıbesi» taqyrybynda konferentsııa ótti. Sol jerde tanymal ekonomıster, sarapshylar men qoǵam belsendileri eńbek qatynastarynyń ózekti máselelerin talqylady. Kásipodaqtar federatsııasynyń tóraǵasy Baqytjan Ábdiraıymnyń sózine qaraǵanda, osy ispetti talqylaý alańdary turaqty túrde uıymdastyrylady. Negizgi maqsat - kásipodaqtardyń jumysyna serpin berý.