Kásipodaqtar federatsııasy Nur Otan partııasyna saılaýshylarǵa qysym jasamaý keregin eskertti
«Bizdiń uıymnyń basty mindeti – jaldamaly qyzmetkerlerdiń, kásipodaq músheleriniń múddelerin qorǵaý. Osyǵan baılanysty biz barlyq partııa ókilderine jumys berýshi tarapynan qyzmetkerlerge qysym jasaý máselesin qadaǵalaıtynymyzdy aıtqymyz keledi. Eger qandaı da bir kásiporyn men uıym qyzmetkerlerin qandaı da bir partııaǵa daýys berýge májbúrlegeni anyqtalsa, bul týraly BAQ-qa habarlaımyz jáne ózimizdiń jalpy esebimizde málimdeımiz», - dedi QR Kásipodaqtar federatsııasy tóraǵasynyń orynbasary Nurlan Óteshev.
N. Óteshev partııany quqyqbuzýshylyqtar týraly aqparatty almasyp otyrýǵa shaqyrdy.
«Sondyqtan, eldegi eń iri saıası kúsh retinde sizderdi de habardar etkimiz keledi. Eger sizder osyndaı faktilerdi baıqasańyzdar, aqparat almasý turǵysynan bizge jiberińizder. Eger qandaı da bir aımaqta jáne ýchaskelerde qyzmetkerlerdiń sizdiń partııańyzǵa daýys berý úshin qysym faktileri anyqtalsa, sizderge osy aqparatty jiberip, nege mundaı jaǵdaı bolǵanyn suraımyz. Biz turaqtylyqty qalaımyz jáne tolqýlar bolmaýy úshin barlyq saılaý protsesteri zań aıasynda ótýi kerek degen mindet qoıyp otyrmyz. Bul baqylaýshylar tarapynan da, saıası partııalar tarapynan da, saılaý komıssııalary músheleri tarapynan da, saılaýshylar tarapynan da arandatýlar bolmaýy úshin kerek. Óz tarapymyzdan biz qazir óz baıqaýshylarymyzdy oqytyp jatyrmyz, trenıngter ótkizýdemiz, búgin ǵana Nur-Sultan qalasynda 250 baıqaýshyny oqytýdy aıaqtadyq», - deıdi spıker.
Óz kezeginde Nur Otan ortalyq apparaty basshysynyń orynbasary Arman Qapesov partııanyń maqsattary da osyndaı ekenin jetkizdi.
«Biz saılaý naýqanynyń tikeleı qatysýshylary retinde ádil, obektıvti saılaý ótkizýge múddelimiz. Sizderdiń baıqaýshylardy ázirleý týraly bastamalaryńyzdy qýana quptaımyz. Biz saılaýdyń adal, ashyq, ótkenin qalaımyz. Partııamyzdyń músheleri men saılaýshylarymyzdy shyn máninde ádil saılaý ótkizýge shaqyramyz», - deıdi A. Qapesov.