Kásipodaqtar federatsııasy «100 jańa esimge» óz úmitkerlerin usynady

ASTANA. QazAqparat - Federatsııa aldymen óz ishinde arnaıy baıqaý ótkizip, úmitkerlerdi iriktep almaqshy. Sodan keıin olardy «100 jańa esim» jobasynyń ekinshi kezeńine usynady, dep xabarlaıdy QazAqparat tilshisi.

QR Kásipodaqtar federatsııasynyń tóraǵasy Baqytjan Ábdiraıymnyń aıtýynsha, búginde kásipodaqtarǵa múshe bolǵandardyń ishinde eldiń damýyna eleýli úles qosqan azamattar az emes. Olardyń ishinde ustazdar, dárigerler, júrgizýshiler, dánekerleýshiler, qurylysshylar, mexanızatorlar jáne taǵy basqa mamandyq ıeleri bar. Osyǵan oraı, federatsııa «Eńbek adamy: Qazaqstannyń jańa kelbeti» atty baıqaýdy jarııalady. Sonyń aıasynda aldymen aımaqtarda úmitkerlerdi irikteý jumysy júrgiziledi. Al respýblıkalyq deńgeıge shyqqandardy «100 jańa esim» jobasyna usynady.

«Negizi, búginde buqaralyq aqparat quraldarynda eńbek adamdary jaıynda kóp jazylmaıdy. Al olardyń qajyrly eńbegi men tájirıbesi qashanda jastarǵa jiger berdi. Osyǵan baılanysty federatsııa xalyq qurmetine laıyqty óz úmitkerlerin usynbaqshy. Qazirgi kezde kásipodaqtarǵa 2 mıllıonnan astam adam kiredi. Olardyń ishinde el damýyna eleýli úles qosyp júrgender kóp», - deıdi B.Ábdiraıym.
 

Aıta keteıik, Qazaqstanda «100 jańa esim» jobasynyń ekinshi kezeńi bastaldy. Ótinimder kelesi aıdyń ortasyna deıin qabyldanady. Odan keıin onlaın daýys berý bastalady.