Kásipodaq ókilderiniń áreketi arqasynda 12 adam jumysqa qaıta alyndy
«Jumys berýshi men jumysshylardyń bastamashyl top músheleri arasyndaǵy sot isi Kásipodaqtar federatsııasynyń erekshe nazarynda boldy. Kásipodaq federatsııasy tóraǵasynyń tapsyrmasy boıynsha Qyzylorda oblysynyń kásipodaqtar ortalyǵynyń ókilderi Marat Báıimbetov pen Maıra Boranbaeva oblystyq eńbek ınspektsııasymen birge sot protsesi barysynda jumysshylardy qorǵaýǵa belsene qatysty. Sonymen qatar, Kásipodaqtar ortalyǵynyń bastamasymen bul másele áleýmettik áriptestik jónindegi oblystyq úshjaqty komıssııanyń qaraýyna shyǵarylyp, kásipodaq alańynda jumys berýshimen de birneshe ret talqylandy», delingen baspasóz baıanynda.
Osyǵan baılanysty, jaqynda sot jumys berýshiniń jumyskerlermen eńbek shartyn buzý áreketin zańsyz dep tanyp, isti toqtatqan. Qyzylorda qalalyq sotynyń sýdıasy M.Toǵyzbaeva azamattardy óz jumystaryna qaıta turýy jáne májbúrli bos júrgen ýaqyttaryna jalaqy tóleý týraly aryzdaryn qanaǵattandyrý týraly sheshim shyǵarǵan.
Sot jumys berýshi eńbek shartyn buzǵanda basshylyqqa alǵan eńbek shartyn QR Eńbek kodeksinen 2020 jylǵy 4 mamyrdaǵy ózgeristermen alynyp tastalǵan 50-baptyń 3-tarmaǵy boıynsha buzýy zańsyz, bul norma azamattardyń eńbek quqyǵyn nasharlatatyn norma dep tanydy.
Quqyqtary qorǵalǵan jumyskerlerdiń biri Azamat Qaljanov áriptesteriniń atynan áleýmettik-eńbek quqyqtaryn qorǵaýǵa atsalysqan kásipodaqtarǵa alǵysyn bildirdi.
«Sot protsesi bizdiń, ıaǵnı, 12 jumystan ádilsiz, negizsiz bosatylǵan jumyskerlerdiń talap aryzdaryn tolyq qanaǵattandyrdy. Ádildik jeńdi. Sot tóraǵasynyń sheshimimen biz jumysymyzǵa qaıta ornalastyq. Kásipodaqtardyń kómeginsiz biz buǵan qol jetkize almas edik.», - deıdi Azamat Qaljanov. Aıta ketý kerek, bastamashyl top músheleri aldaǵy ýaqytta kásipodaq uıymyn qurýdy josparlap otyr. Bul eńbek ujymyndaǵy jaǵdaıdyń odan ári damýy Qazaqstan Respýblıkasy Kásipodaqtar federatsııasynyń baqylaýynda bolady.