Kásipqoı boks: Asa aýyr salmaqtaǵy Rýslan Myrsataev jeńimpaz atandy

ASTANA. QazAqparat - Táýelsizdik kúni merekesine oraı Astanada ótip jatqan kásipqoı boks keshinde sharshy alańǵa sońǵy bolyp shyqqan Rýslan Myrsataev ta qarsylasynan basym tústi,  dep habarlaıdy «QazAqparat» tilshisi.

Sýperaýyr salmaqta el namysyn qorǵaǵan otandasymyz ýkraınalyq Pavlo Krolenkomen qolǵap túıistirdi. Asa tartysty ótken jekpe-jek qorytyndysyn jarııalaǵan tóreshiler biraýyzdan Myrsataevty jeńimpaz dep tapty.

Osy oraıda aıta ketsek, Rýslan Myrsataev -2008 jylǵy Olımpıada oıyndarynyń qatysýshysy, Búkilálemdik boks serııasynda «Astana Arlans» quramyndaǵy jeńimpaz. Segiz raýndtan turatyn jekpe-jekte Myrsataev (profı-rıngtegi 5 kezdesýin jeńispen aıaqtaǵan) kásibı boksta ekinshi kezdesýin ótkizetin Pavlo Krolenkony aıqyn basymdylyqpen utty.

Kásibı boks keshi Qazaq Promoutions promoýterlik kompanııasynyń uıymdastyrýymen ótti. Aıta keteıik, «QAZAQ promotions» promoýterlik kompanııasynyń negizin qalaýshy, tanymal kásipqoı boksshy Qanat Islam. «QAZAQ promotions» Amerıkanyń iri promoýterlik kompanııalarymen birlesip, úlken boks keshterin uıymdastyrýǵa baǵyttalǵan.