Kásipqoı boks: Abylaıhan Qusaıynov qarsylasyn nokaýtpen utty

ASTANA. QazAqparat - Táýelsizdik kúni merekesine oraı Astanadaǵy ótip jatqan kásipqoı boks keshinde Abylaıhan Qusaıynov qarsylasyn tehnıkalyq nokaýttpen jeńdi, dep habarlaıdy «QazAqparat» tilshisi.

Otandasymyz ýkraınalyq  Maksım Morozben judyryqtasqan bolatyn. Osyǵan deıin  eshkimnen jeńilip kórmegen Abylaıhan Qusaıynov (toǵyz kezdesýdiń toǵyzynda jeńiske jetken) búgin qarsylasyn úshinshi raýndta tehnıkalyq nokaýtqa túsirip kezekti jeńisine qol jetkizdi.

Al Moroz úshin bul kásibı bokstaǵy alǵashqy jekpe-jegi. Ókinishke qaraı alǵashqy aıqasynda jeńilip qaldy.

Al Abylaıhan Qusaıynovtan keıin sharshy alańǵa shyqqan Aıdar Sháribaev ta qarsylasyn aıqyn basymdylyqpen utty. Ol birinshi raýndta jáne tórtinshi raýndta eki márte nokdaýnǵa jiberdi. Alaıda, qarsylasy barlyq alty raýndqa shydady. Tóreshiler biraýyzdan otandasymyzdy jeńimpaz dep tapty.

Aıdar Sháribaev osyǵan deıin 7 jekpe-jek ótkizip, 6-ynda basym túss, bireýinde jeńilip qalǵan. Al qarsylasy - 37 jastaǵy tájirıbeli boksshy ýkraınalyq Artem Aıvazıdı buǵan deıingi 25 kezdesýiniń  11-in jeńispen aıaqtaǵan.

Eske sala keteıik, kásibı boks keshi Qazaq Promoutions promoýterlik kompanııasynyń bastamasymen Astanadaǵy «Dáýlet» sport kesheninde ótip jatyr.