Kásipkerlikke yntasy bar jastarǵa 2,5% nesıe beriledi - Tamara Dúısenova

TÚRKІSTAN. QazAqparat – Memleket basshysynyń Joldaýda bergen tapsyrmalaryn oryndaý maqsatynda jastardyń kásipkerlik bastamalaryna qoldaý kórsetý jalǵasady. Bul týraly Túrkistan oblysynyń Óńirlik kommýnıkatsııalar qyzmeti alańynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat.

Mınıstrdiń aıtýynsha, Áleýmettik kodekste jastardy jumyspen qamtý memleket, jumys berýshi, ıaǵnı jumyspen qamtylatyn azamattyń jaýapkershiligi qaǵıdatymen júrgizý qarastyrylmaq.

«2000 jyldan keıin týǵan jastar búginde eńbek jasyna jetip jatyr. Sondyqtan jalpy jumys kúshiniń 56%-y 1987 jyldan keıin týǵan jastar bolsa, 2030 jylǵa qaraı jalpy jumys kúshiniń deni osy jastardyń esebinen bolady. Áleýmettik kodekste birinshiden jastardy jumysqa tartý boıynsha sharalar qarastyrylǵan. Mysaly, jyl saıyn 100 myńnan astam jastar memleket tarapynan sýbsıdııalanatyn jumys oryndaryna tartý. Sondaı-aq kásipkerlikke yntasy bar jastarǵa 2,5%-dyq jeńildetilgen qaıtarylatyn nesıe berilmek», - dedi T. Dúısenova.

Mınıstr budan bólek, múmkindigi shekteýli, biraq kásipkerlikke yntasy bar jastarǵa beriletin granttar odan ári jalǵasyp otyrǵanyn aıtyp ótti.

«Bul rette, olarǵa beriletin qarjynyń somasy bıyl 1,2 mln-nan asty. 2023-2025 jj. arnalǵan bıýdjette osy máseleler boıynsha 300 mlrd teńge jýyq qarajat kózdelgen. Qujat Májiliste qaralyp jatqan bıýdjet jobasynyń aıasynda qaralady», - dedi T. Dúısenova.

Mınıstr baspasóz brıfınginde jýrnalısterdiń suraqtaryna jaýap beredi.

Eske sala ketsek, 12-13 qazan kúnderi QR Eńbek jáne halyqty áleýmettik qorǵaý mınıstrliginiń arnaıy mobıldi toby Túrkistan oblysynyń Qazyǵurt, Shardara, Keles, Sozaq aýdandarynda jáne Kentaý qalasynda aqparattyq-túsindirý jumystaryn júrgizdi.