Kásipkerlerge tutynýshylardan mobıldik qosymsha arqyly túsetin aqshalardy fıskalızatsııalaý qajet – Á.Smaıylov

NUR-SULTAN. QazAqparat – Kásipkerlerge bankterdiń mobıldik qosymshalary arqyly tutynýshylardan túsetin aqsha aýdarymdaryn fıskalızatsııalaý máselesine erekshe nazar aýdarýy qajet. Bul týraly búgin Úkimet otyrysynda QR Premer Mınıstriniń birinshi orynbasary Álıhan Smaıylov aıtty, dep habarlaıdy QazAqparat tilshisi.

«Byltyr qıyn ekonomıkalyq jaǵdaıǵa qaramastan, memlekettik bıýdjettiń kiristeri aldyńǵy jyldyń deńgeıde saqtaldy. Respýblıkalyq bıýdjetke túsetin túsimder tómendedi. Biraq ol jergilikti bıýdjetke túsetin túsimder arqyly tolyqtyryldy. Nátıjesinde memlekettik bıýdjet 65 mlrd teńgege asyra oryndaldy. Bıýdjettiń kirister bóligin arttyrý – basym mindetterdiń biri. Oǵan, osy baǵyttaǵy tsıfrlandyrýdyń barlyq áleýetin qoldaný mańyzdy. Bul rette, «kóleńkeli» ekonomıkanyń deńgeıin tómendetý, tabystardy arttyrýda basty ról atqarady», - dedi ol.

Onyń aıtýynsha, osy baǵytta Taýarlardy qadaǵalaýdyń ulttyq júıesi quryldy. Sondaı-aq Táýkelderdi basqarý júıesi, Elektrondyq shot-faktýralar, «Astana-1» aqparattyq júıeler engizildi.

«Sońǵy 3 jyldyń ishinde joǵaryda kórsetilgen sharalar bıýdjetke qosymsha 2 trln teńgeden astam túsimderdi qamtamasyz etýge múmkindik berdi. Osyǵan baılanysty, bul baǵyttaǵy jumysty kúsheıtý kerek. Sonymen birge, Qarjy mınıstrligi kásipkerlerge bankterdiń mobıldik qosymshalary arqyly tutynýshylardan túsetin aqsha aýdarymdaryn fıskalızatsııalaý máselesine erekshe nazar aýdarýy qajet. Jalpy, barlyq múddeli memlekettik organdar osy baǵyttaǵy úılestirilgen jumystardy jalǵastyrýy tıis», - dedi Álıhan Smaıylov.