Kásipkerlerge qatysty qadaǵalaýdyń úshten eki bóligi qysqartylady - Tımýr Qulybaev

ORAL. QazAqparat - QR Bas prokýratýrasymen birlese otyryp, memlekettik organdar tarapynan kásipkerlerge qatysty júrgiziletin baqylaý-qadaǵalaý  qyzmetin azaıtatyn bolamyz. Bul týraly BQO-ǵa jumys sapary kezinde oblystyq kásipkerler palatasy óńirlik keńesiniń keńeıtilgen jıynyna qatysqan «Atameken» Ulttyq kásipkerler palatasynyń tóralqa tóraǵasy Tımýr Qulybaev málim etti, dep habarlaıdy «QazAqparat» tilshisi.

Onyń aıtýynsha, 28 myń baqylaý-qadaǵalaý qyzmetiniń úshten eki bóligi qysqartylady. Túptep kelgende, kásipkerlerge qoıylatyn talaptardy 60 paıyzǵa deıin azaıtýǵa bolady. Bul, bir jaǵynan, memlekettik apparat jumysyn jeńildetse, ekinshi jaǵynan, kásipkerlerge qolaıly jaǵdaı jasalady. Eń bastysy, jergilikti atqarýshy organdar kásipkerlermen qoıan-qoltyq jumys jasap, qoldaı bilýleri kerek. Bul rette oblystyq kásipkerler palatasy, «Atamekenniń» aýdandardaǵy ókildikteri ákimdiktermen birge ózara tıimdi jumys atqara alady.
 

Jıynda oblystyq kásipkerler palatasynyń dırektory Nurlan Qaıyrshın, Batys Qazaqstan oblysynyń ákimi Altaı Kólginov ótken jyl qorytyndylaryna, sondaı-aq Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes kásipkerlikti damytý baǵytynda alda turǵan maqsat-mindetterge toqtaldy. Memleket basshysynyń tapsyrmasyna sáıkes qolǵa alynǵan baǵdarlamalardyń nátıjesinde 2016 jyly óńirde kásipkerlikti qoldaýǵa 3,9 mlrd. teńge bólinse, bıyl 5 mlrd. teńgege jaqyndap, 1 mlrd. teńgege kóbeıip otyr. Sonyń ishinde aýyldaǵy kásipkerlikti damytý aıryqsha nazarda bolmaq. Osyǵan oraı bul maqsatqa «Atameken» UKP 300 mln. teńge bólse, oblys tarapynan da sonshama qarjy qaralatyn bolady.
 

Jıynǵa qatysqan kásipkerler salanyń damýyna kedergi keltirip otyrǵan keıbir túıtkildi jaıttardy da ortaǵa salyp, óz usynys-pikirlerin bildirdi. Sonyń ishinde «Bıznestiń jol kartasy - 2020» baǵdarlamasy boıynsha óńirlik úılestirý keńesi arqyly qoldaý tapqan jobalardyń da qarjylandyrýsyz qalyp otyrǵany aıtyldy.