Kásipkerlerge kámeletke tolmaǵandardy eńbekke zańsyz tartqany úshin jazaǵa tartylatyny eskertildi
Bilim berý sapasyn qamtamasyz etý departamentiniń ókili jyl saıyn oqýshylardyń jazǵy demalysy bastalysymen elimiz boıynsha 1-12 maýsym aralyǵynda «Balalar eńbegin paıdalanýǵa qarsy 12 kún» ulttyq aqparattyq naýqan ótetinin atap ótti.
Sharalar aıasynda bilim berý organdarynyń ókilderi, polıtsııa qyzmetkerleri kásipkerlerge kámeletke tolmaǵandardy eńbekke zańsyz tartqany úshin jazaǵa tartylatynyn eske salady.
«18 jastan kishi kámeletke tolmaǵandar túnde jumys isteı almaıdy, olarǵa aýyr jumysty tapsyrýǵa bolmaıdy. 16 jasqa deıin eńbek shartyna ata-analardyń biri qol qoıýy kerek. QR Eńbek kodeksine sáıkes 14-16 jastaǵy balalar aptasyna 24 saǵattan, al 16-18 jastaǵy jasóspirimder 36 saǵattan artyq jumys istemeýi tıis», - dedi Gúldana Omarova.
Sonymen qatar, ol balalardyń zańsyz jumysqa tartylǵanyn kórgen adam myna qaýyrt jeli 225-18-80 nómirine qońyraý shalý kerektigin eskertti.
«Eger siz balalardyń densaýlyǵyna, qaýipsizdigine zııan keltirýi múmkin jumysqa tartylǵanyn bilseńiz, oǵan nemquraıly qaramaı, tıisti quzyrly organdarǵa birden habarlaǵanyńyz jón. Óıtkeni, bala densaýlyǵy onyń quqyǵyn qorǵaý - bárimizdiń ortaq isimiz», - dedi spıker.
Gúldana Omarova 2019 jyly Telegram messendjerinde «Bala Qorgay » kanaly qurylǵanyn atap ótti.
Ol kámeletke tolmaǵandarǵa qatysty quqyq buzýshylyq nemese qatygezdik faktilerin tirkeýge arnalǵan. Kanaldy ashý bastamasy QR Bilim jáne ǵylym mınıstrliginiń balalardyń quqyqtaryn qorǵaý komıtetine tıesili.
«Ótken aptada «Bala Qorgay» chatyna 63 suraq tústi. Shuǵyl áreket etý sharalary qabyldandy. Mysaly, ata-analarǵa keńes berilip, túsindirildi, ómirlik qıyn jaǵdaıǵa tap bolǵan balaǵa kómek kórsetildi», - dedi ol.
Bul rette kelip túsken máselelerdiń negizgi bóligi quqyqtyq aqparattandyrýǵa qatysty. Keri baılanys táýlik boıy, demalyssyz jumys isteıdi.